رواية بلا ميعاد : الفصل الثاني للكاتبة / اديم الراشد

 

الحلقة الثانية ..

 

📖 روايـــــــــــــة

{  بلا ميعاد }

 

في طرف ثاني همست عنود لساره : وش بيسوي سطام

ساره : الله يساعده بس على اللي بيصير

جوري : اخاف تكبر

عنود : يا ويلي

شريفه لفت لسند : وينه ولدك هالسايب !

سند : مصعب لاهي بدراسته

شريفه : لاهي والا داشر مع ذا اليهود اللي يشوفكم يقول ما في السعوديه جامعات ومدارس

سند: السعوديه هي اللي ارسلته

جميله : لا يا عمه ان شاء الله بيرجع بالشهاده

شريفه : نشوف نشوف

الجد : ايوه يا شريفه طمنينا عنك وش اخبارك

شريفه : والله يا خوي ابد انهد حيلي من ذا السكر

مازن بهمس لسطام : كل ذا اللسان وهي مهدود حيلها الله يهد حيلي مثلها

سطام دفه وهو يبتسم : ان حست ان حاش فيها بتهد حيلك هي

ابتدت شريفه تاخذ اخبار المجلس واحد واحد بدون استثناء ..........

 

اكيد الكل يسأل من شريفه ( شريفه : اخت الجد الكبيره انسانه لها جبروت وكلمة مسموعه الكل يحترمها غصب عليهم وينفذ امرها حتى سند ومحد يقدر يرد عليها اذا قررت قرار هو اللي يمشي شخصيتها صعبه وعصبيه بعكس اخوها الحبيب الطيب المسالم )

٠

٠

عند دانه اللي كانت تشوفهم من الشباك وهي خايفه وشايفه ارتباك الكل جلست وهي خايفه من ذا الحرمه  وحاسه ان مصايب الدنيا بتتجمع على راسها من وراها

٠

٠

نرجع لهم الكل قام يجهز الغداء ووقفت شريفه وهي تقول : تعال يا سطام

اخذ سطام نفس وهو يتجه لها ومشت وهي تشوف المزرعه وقالت بحده : وش انت مسوي من مصيبه ذي المره

سطام : ابد ما فيه الا كل خير

شريفه : لا تخليني انادي سند يقول السالفه

تو سطام بيفتح فمه الا دخل سند وكب كل السالفه طبعا مع معتقداته السيئه وشرح الخطأ وخبص كل شي على سطام اللي لا شعوريا صرخ فيه : ياخي خاف ربك من  ظنونك السوداء هاذي خاف ربك

سند : انا اخاف ربي علم نفسك مخافة ربك قبلي

ابو مازن : الامور ماهي مثل ما انت فاهم يا سند

شريفه : سطام تعال واشرح لي اللي صار كله

تنهد سطام وهو يتجه لها جلس وهو يحكي لها نفس اللي حكاه لهم ويحاول يستدرجها ويستعطفها قد ما يقدر  والكل يراقب الوضع انتهى سطام وهو يحاول يجي لها من يدها اللي توجعها : يعني يا عمه حرمه لحالها في ذا المكان الموحش لو انك مكانها او بنتك الله يرحمها بمكانها ترضين ان احد يتركها كذا الناس لناس الكل بالله والا انا غلطان

عم السكوت وقالت شريفه: وينها هي

سطام : موجوده

شريفه : خذني لها

سطام : ابشري

مازن لنايف بهمس : سطام عقله ماشاء الله عليه ضرب في الوتر الحساس

نايف :اصبر اصبر باقي ما استقرينا

٠

٠

عند دانه اللي شافتهم جايين لها وخافت رجعت لفراشها برعب وهي تناظر الباب دخلت شريفه بهدوء وهي معاها ساره اللي قالت : دانه سطام بيدخل

تغطت وهي ترجف من هيبة شريفه ونظرتها القاسيه

دخل سطام بهدوء : دانه هاذي عمتي شريفه بتتكلم معك

دانه ما قدرت تنطق ولفت شريفه تقول : اتركوني لحالي معها

طلعوا ودانه ودها تصرخ ودها تقول لا تروحون قربت شريفه وجلست ونزلت دانه طرحتها وهي تناظرها بعيون مليانه دموع

شريفه : وش اسمك !

دانه: دانه

شريفه : وش بينك وبين سطام بالتفاصيل

دانه برجفه : ما بينا شي انا صحيت وحصلت نفسي هنا هو قال انه حصلني طايحه بجنب خط سريع وانقذني لكن انا ما اتذكر شي حتى اسمي بس حصلوا اسمي في سواره بيدي

شريفه بحده : لا تكذبين وتستغفليني سامعتني

دانه بكت : والله ما اكذب والله هذا اللي اعرفه واللي قالوه لي والله

شريفه ناظرتها بهدوء وطلعت وهي تقول : نتصرف نتصرف

كان سطام جالس هو وساره وسطام يهز رجله بسرعه وتوتر فز اول ما شاف شريفه

شريفه : تقول مابينكم شي

برد وجه سطام وتوقع انها قالت لها عن اغتصابها

٠

٠

عند فارس اللي كان جالس وهو يفكر بإنقلاب صوت فهد اللي من يومين مو مريحه وتصرفاته المريبه وقف بهدوء وهو يمشي بعصاته واتجه وهو ينادي مؤمن يتصل له على رقم حافظه عن ظهر غيب دق وهو ينتظر الرد بس محد رد نزل جواله بضيق وهو يعطيه مؤمن وجلس وضايق

٠

٠

عند سطام غمض  وهو ياخذ نفس :ما بينا شي زي ما قلت لك

شريفه قربت وهي تدق بعصاها : خل البنت عندكم واهتم فيها قد ماتبي لكن اذا حسيت او عرفت ان بينكم شي والله اجي انا بنفسي واسلمك واسلمها الشرطه

ابتسمت ساره بفرح وسطام وسند اللي فار وعصب وانقهر:كيف يعني

شريفه مشت وتركتهم وهي تفكر تفكير طويل ولف سطام ببتسامه وراح مع ساره لدانه اللي انهارت تبكي

سطام: دانه لا تخافين ماصار شي

ساره: دانه حبيبتي هذي هاذي عمتي صح قويه بس طيبه ..

سطام: لا تخافين بتجلسين هنا معززه مكرمه

ساره:انتي الحين اختنا لا تخافين

دانه بصوت باكي:كانت تخوف

سطام ابتسم لها بهدوء: عادي هيبه بس

دانه :يعني ما بتسوي لي شي

سطام بمزح : انتي حاولي تسلكين لها قد ما تقدرين وامدحيها امدحي بكل شي وعني تصيرين التوب

ساره: لاااا لاااا لا تحتكين ابد خليها تسوي اللي تبي بس ابعدي

دانه بيأس :اصدق مين ؟

سطام:اقترح ساره

ساره: دام عادي الوضع يلا تعالي معاي بنجلس مع البنات برا

دانه: لا تكفين خليني اجلس

سطام:لا لا روحي وغيري جو عشان تتشافين ..

٠

 

فهد اللي اتجه لفارس ودخل وهو يقول : سلام يا هوه

فارس : اهلا كنت بناديك

فهد : عساه خير

فارس : انت اللي بتحدد

فهد بهدوء : فارس صاير شي

فارس : ايه

فهد حس بخوف وقرب وهو يمسك يده : لا تخوفني وتكلم

فارس : ليش اختبصت لما جاب سطام طاري مكان البنت

فهد بهت وجهه : ولا شي بس استغربت يعني مكانها احسه مو تمام

فارس : وكأنك تعرف المكان كثير !

فهد بعد يده بسرعه وغضب: وش قصدك يعني ؟

فارس : ابد اسالك اذا تعرف المكان

فهد : وش فيه المكان عشان ما اعرفه

فارس : فهد اذا مخبي شي تكلم قبل يفوت الاوان وتندم

فهد : يوه يا فارس تراك صاير تملل قلت لك مكان اعرفه امر عليه اذا رحت مع سطام وسالت لاني احس المكان سيء وانتهى

فارس : براحتك يا فهد بس مصير الخافي ينكشف

وقف فهد بغضب : والله عاد هاذي الحقيقه صدقت صدقت ما صدقت براحتك

وكان ردت الفعل هاذي من فهد اكدت لفارس ان فيه شي فهد يعرفه بخصوص البنت وهاذي ردت فعل غريبه على فهد المستهتر اللي ما عمره اخذ اي كلام على محمل الجديه

طلع فهد ترك فارس اللي دق جواله وتلمسه وهو يعرف طريقة 

جواله اللي مخصص للمكفوفين وابتسم لما عرف من اتصل ورد : طولت عيوني !؟

 **** : اسفه والله توني شفت الاتصال وعلى طول اتصلت فيك

فارس : مو مشكله المهم اتصلتي

 **** : شخبارك مسوي شخبار اصحابك

فارس: ابد مستقرين ومع مشكلة البنت اللي خبصت الكل

**** : ما فهمت سالفتها واحس وراها شي

فارس : ما علينا منها مشكلتها مع سطام تتفاهم هي وياه

**** : وانت الصادق قولي بس وش اخبارك انت وش مسوي كيف اوضاعك

فارس: انا بخير ما ناقصني الا اني اشوفك معي بس

****: ان شاء الله ان شاء الله

وكمل فارس مع غامضته اللي ما احد يدري بها وعلى كثر ما يغليها ما يناديها الا ( عيوني )

٠

٠

في طرف ثاني كان مازن جالس بهدوء ولا جلسة الحريم وفي يده ( جرو ، كلب صغير ) وبحركة سريعه رماه على الجوري والكل كان متغطي لان الرجال داخلين طالعين واتقلبت الجلسه صراخ وحوسه ولكن نجت جوري بس ما تركها مازن اللي ركضت وهو ياخذه وركض وراها : جيبي الصوره

عند سطام اللي ركض بضحك: مازن حرام عليك

مازن كان يطارد الجوري وجوري تصرخ وسطام وعنود وراهم لكن العنود ما كانت تركض وراهم وناسه كانت تبي تنبه مازن لشي خطير كلهم نسوه

ولكن مع الاسف ما لحقت وطاحت جوري اللي صرخت  لما انهد حيلها وجلست وهي تحاول توقف مازن وتكلمه بس تحس بخنقه تحس بألم يجتاحها واخر شي مسكت يد مازن اللي رما عليها الكلب وشدت عليه وطاحت مغمى عليها وفجاءه صرخت عنود : مازن البنت فيها القلب مايصير تخاف يا غبي

وقف مازن برعب لما تذكر ولا حس الا ب سطام اللي دفه وهو يرفع جوري ويحاول يصحيها

واجتمعوا الكل على الصراخ وركض سند وهو يدف سطام : وش سويت في بنتي

سطام : ولا شي كنا نلعب وفجاءه طاحت

سند رجع يدف سطام بقوه : انقلع من هنا دق على الاسعاف

رجع سطام لورا وهو يدف مازن اللي كان مصدوم ولا شافه سند اخذ جواله وهو يتصل واعطى الاسعاف العنوان وسكر

مازن : سطام وش صار لها

سطام: ابعد من هنا انا اللي طيحتها سند لو يدري انه انت بيذبحك و تنشب في مشاكل معه عشان كذا روح

مازن : سطام لا تستهبل انا اللي طيحتها وانت مو ناقص

مارد عليه سطام اللي رجع بسرعه وهو يقول : عمي انادي ابو فهد يهتم فيها على ما يوصل الاسعاف

سند صرخ في سطام : باقي بتجيب باقي مجرمينك

سطام صد بضيق واجتمعوا الكل وام الجوري بس تبكي والبقيه يحاولون يصحونها

وشوي جاء الاسعاف واخذ جوري وسند معاها ورفض يروح معهم اي احد الا امها

رجع سطام ركض لمازن اللي كان مرعوب وعنود تخاصمه

سطام: عنود خلاص

عنود : ياخي شفيك انت ترا صوره بس ما اجرمت فيك تقوم تخلع المسكينه

مازن: شدراني انا نسيت

سطام: قلنا خلاص وهذا مزح معها بس

عنود: اتوقع لو تموت بتقولون ما تتحمل المزح

راحت وهي ضايقه ورجعت وهي تجلس مع ساره ودانه اللي يراقبون الوضع بتوتر

ساره: تعالي عنود احكي وش صار جوا

دخلت هي ودانه وساره بهدوء للغرفه وجلسو

ساره: وش صار

قالت لهم عنود اللي صار وقالت دانه: طيب هي وش فيها

ساره : مريضة قلب وماتتحمل

دانه : طيب ومازن مايدري

عنود : يعني هو نسى لانه من زمان ما جاء لها تعب قبالنا على ايام مصعب وهو نسى

دانه: مين مصعب

ساره : اخوها مبتعث من زمان يعني كان هو الله يصلحه مسبب لها رعب وما يتحمل واغلب الوقت زعلان ويصرخ عليها

عنود : قطع ذاك الوجه

دانه: ليش سند كذا

سكتوا كلهم بهدوء ووقفت ساره بانسحاب: بروح اشوف وش صار على سطام ومازن

عنود : كلنا بنروح يلا

وقفوا وراحوا ودانه محتاره ليش سكتوا ..

٠

٠

عند الشباب نايف اللي متكتف وهو يقول : وانت مالقيت تفجع في كل ذا المزرعه الا بنت سند كنت افجعني انا والله ماعندي مشكله

مازن اللي كان متوتر: ماهمني المشكله اني نسيت انها مريضه كنت بمازحها والله كسرت خاطري انا شايل همها ماهمني سند

سطام: انتهى موضوع سند عندي ابعد انت عن المشاكل

مازن : يا سطام لا تستهبل

ساره من وراهم: وش فيكم

مازن جلس بضيق وجات له ساره :وش فيك انت بعد جوري ان شاء الله بخير خلصنا لا تعفس وجهك

مازن : والله نسيت نسيت يعني لو كنت عارف والله ما افجعها

ساره :خلاص هي بخير شوي وتجي وتفرمك

سطام : ان شاء الله

٠

٠

عند الجوري اللي استلموها الطوارئ وابتدوا يعالجوها وجلست امها معها اما سند جلس بضيق وهو متكتف في الاستراحه وقاطعه شاب يقول : لو سمحت بسالك

سند بغضب: نعم

الشاب : فقدنا لنا بنت بحادث في عمر العشرين قبل يومين ما تدري عنها شي. .

٠

٠

وعند فهد اللي كان جالس بضيق بسيارته يتنظر واحد نزل غمض وهو يدق رجله بغضب فتح لما سمع الدق على القزازه نزل وهو يقول : سنه احتريك

****: شتبي اقلقتني وطلعتني من مودي

فهد : كلمتين ورد غطاهم

**** : وش فيك معصب

فهد : بسالك وجاوب وانقلع بعدها لمودك

****: ياليل الفكك خير نعم وش تبي

فهد:وين وديت البنت اللي حصلناها بالطريق

****: شتبي فيها بتكمل عليها !

فهد ضرب السياره بغضب : وين وديتها اخلص

****: رميتها بذيك الخرابه انت تعرفها

فهد بتاكد : الخرابه اللي قبل السوق

****: شفيك صابك زهايمر ايه كل يوم نمرها ترا

فهد دفه بغضب : انقلع من هنا

****: فهد سكت لك كثير

فهد : وش بتسوي يعني هاه وش بتسوي

****: لا تخليني اسوي شي اندم عليه

فهد : اندم على حياتك قبل افعالك

وبدون سابق انذار سحب **** سكين معاه وغرسها في فهد اللي ما توقعها وصرخ دفه وهو يسحب السكين : تحملتك كثير وهذا درس لك

راح وترك فهد طايح من الالم بدون ما يلتفت .

.

.

وعند سند اللي رفع راسه يناظر الرجال بهدوء لكن قطع عليه ام الجوري اللي ركضت له : تعال شوف وش بيسوون للبنت

فز وترك الرجال وركض وشاف الاطباء حول جوري

سند: وش فيه وش بتسوون

لف دكتور:ولا شي بس جالسين نعاين حالة بنتك

سند : وشو له الزحمه

الدكتور: هذول اطباء امتياز

سند : يعني بنتي مافيها شي

الدكتور : لا بنتك بخير وكلها كم ساعه وتاخذها معك وبخير

سند رجع بسرعه وهو يدور على الرجال بس ما حصله ضرب الجدار بغضب :ااااخ بس اااااااخ

٠

٠

وبعد ساعتين كان فهد بالمستشفى بعد ما اسعفوه شباب صحى وهو يتألم وشاف ابوه فوق راسه

ابو فهد : فهد ابوي صحيت كيفك الحين

فهد بألم : مين جابني هنا

ابو فهد : من اللي طعنك شفته ؟ تعرفه

فهد بصعوبه :لا ما شفته

ابو فهد : وش يبي منك

فهد : كان يبي يسرقني

ابو فهد : ارتاح الحين وبعدين نتفاهم

سكت فهد وهو في نفسه يتحلف فيه ويتوعد ..

٠

٠

وعند سطام اللي كان جالس بقلق على الجوري وقف بضيق واتجه للمطبخ شاف البنات مجتمعين ومعاهم دانه

ساره: سطام تبي شي

سطام : ابي مويه

عنود : ما تدري عن الجوري

سطام : ما يرد عمي

هديل : يا ثقل دمه وش فيها اذا طمنا

سطام : لا تسأليني ، هديل جيبي جهاز السكر حق جدي بسرعه

ساره اعطت سطام المويه وهي تقول بخوف : سطام تكفى شوف جدي لا يصير له شي

سطام : ابشري

اخذ الاغراض وطلع متجه للجد ابتسم له بهدوء لما شافه قلقان وقرب وهو يجلس : افا ليش ليش ليش كل ذا الضيق جوري بخير وامورها بخير وانت لا تضيق ازمه وبتعدي

الجد :هي وش سبب طيحتها من زمان ما طاحت كذا

سطام : كنت امزح انا وياها وشكلها خافت لما شافت الكلب

الجد: الله يهديك يا سطام

ابو مازن: كأن سند ناقص هواش معك

سطام رفع كتفه ببتسامه : يوه ياعمي اصلا ما اتوقع اني في يوم بكلمه عادي مثل الناس الطبيعيين احس اذا ما تهاوشنا ينقص شي

نايف ضحك: اهنيك على ترقيع المشاكل .

ضحك سطام وهو يعطي جده الابره وقالت شريفه بحده : كل المشاكل اللي تصير الحين من ورا ام سند ماتت ولا مات آذاها

ابو مازن بسرعه : ماله داعي يا عمه الله يرحم من مات ويهدي الحي

الجد هز راسه بضيق: خلاص خلاص

سطام اللي ماكان فاهم ليش في كل مشكله تصير بينه وبين سند لازم شريفه تحطها براس ام سند رغم انها ماتت من سنين ولا يذكر انها سوت شي سيء

صحى من افكاره على وصول سند اللي نزل وترك الجوري وام الجوري ينزلون اتجه لسطام بغضب وهو يسحبه بإتجاهه وصرخ: انا ما قلت لك مالك شغل بعيالي

سطام بهدوء سحب يده وهو ينزلها : انا ما آذيتها عن عمد كنا نمزح

سند بصراخ: من سمح اصلا تمزح معها هاه اسمعني زين لا اشوفك تحتك في جوري ابد كل اللي يصير لها من تحت راسك

سطام بعصبيه : قلت لك ماني متعمد وانتهى الموضوع

سند دف سطام بغضب : جاي تكمل اللي بداه ابوك معي جاي بتدمر حياة عيالي بعذر ابوك

هنا الكل سكت بعد صراخ سند اللي انفجر في لحظه ما اهتم سطام لكل اللي صار معه بس وش دخل ابوه

وقف وهو مقطب حواجبه باستغراب : وش دخل ابوي الحين

شريفه : سند انتهى الموضوع بنتك بخير وسطام ماقصد يأذيها وانتهى الموضوع خلاص يلا كل واحد يشوف شغله

سطام : لا ما انتهى ابي اعرف وش دخل ابوي وش اذآك فيه ؟! ليش كل مره تتعمد تفتح موضوع ابوي في كل شي سيء ، اليوم ابي افهم

ابو مازن : مافيه شي تفهمه يا سطام مجرد غضب تعوذ من ابليس

الجد : سطام الله يرضا عليك خلاص

جلس سند بغضب اما سطام اللي طلع وهو ضايق وما كان ضيقه على سند كان ضيقه على ذكرى ابوه وقف جنب خيله وهو يحاول انه يهدأ بس عجز كان يحاول انه يربط ايه شي في راسه بس ما قدر

جلس بهدوء وسمع صوت مازن : سطام قلي وش استفدت الحين

فز سطام وسحب مازن وهو يجلسه: اترك كل الهواش انا متعود عليه بس قلي وش ممكن يكون تفسير كلام سند وكلام شريفه

مازن: ماله تفسير شريفه من عرفنا الدنيا وهي تكره جدتي غيرة حريم اما سند بس يتكلم

سطام : لا ما يتكلم بس فيه شي فيه شي وانا لازم اعرفه

مازن : سطام مافيه شي متعلق بعمي الله يرحمه كل السالفه عشان جوري بس

سطام وقف وهو يمسح جبينه بتوتر

مازن : اترك الموضوع يعدي لا تأزم جدي بعد

سطام غمض بهدوء :وانا وش اللي مخليني بالع موس وساكت غير جدي

مازن : طيب اسمعني بروح اقوله اني انا خوفت جوري

سطام :شوف عاد بعد كل هالهواش بتروح تقول صاحي انت خلاص قلت لك انتهى

مازن سكت وهو حاس بالذنب وسطام اللي كان مثل المقروص يقوم ويجلس وهو يفكر

٠

٠

عند البنات اللي طلعو من عند الجوري اللي نامت بتعب ورجعوا لغرفة سطام اللي اصلا متواجده فيها دانه ذي الفتره

عنود ركت نفسها بضيق : مسكينه تعبت مره

دانه : الله يشفيها

هديل : وسند ذا خير وش في راسه طيب ندري انها تعبانه بس بنشوفها

ناديه : انا لين هنا وخلاص احس اكتفيت بذي الاحداث بنام

هيفاء : صادقه حتى اليوم صاحين بدري

هديل : والله من جد احس خلاص

استأذنوا وراحوا ينامون وجلست ساره بضيق

عنود : وش فيك

ساره : نفسي نروح الاسطبل

عنود : مع ذا الليل صاحيه انتي

ساره: والله خايفه على سطام احسه انقهر

عنود : انا شفت مازن راح وراه وبعدين حتى لو رحنا كالعاده ما بيتكلم ويجلس ساكت

ساره : حسبي الله بس

دانه اللي كانت تراقبهم بهدوء : ليش سند يكره سطام

عنود :ما يكرهه بس يكره حال سطام

دانه :وش فيه حال سطام

ساره : بس عشانه عاطل

دانه : طيب وينه ابو سطام من كلام سند واضح ان بينهم مشاكل

ساره تنهدت بضيق : قصة طويله بس عمي ابو سطام مات من زمان هو وامه

دانه ناظرت بحزن : الله يرحمهم

ساره: وش رايكم نروح

عنود : ادري ما تسكتين الا لما تحققين اللي براسك يلا

ساره: دانه بتجين معنا

دانه بتردد : طيب

طلعوا لكن وقفهم احد عند الورد ساره : سطام

لف سطام لها : هلا

ساره ارتخت براحه: كنت بروح لك الاسطبل بس الحمدلله اني شفتك

سطام :وش تبين فالاسطبل!؟

عنود جلست جنب سطام وهي تدفه : عجزت فيها الا بتروح تدور على الطفل حقها

سطام بطرف عين : وش قصدك ؟ عنود : مدري اذا انت تدري كويس

ابتسم سطام وهو يلف لدانه : اتوقع انضم عضو جديد للعصابه

عنود :وش قصدك بعصابه !؟

سطام : مدري بس اذا انتي تدرين كويس

ساره : خلك من العصابه قولي تعشيت

سطام : والله مالي نفس لاي شي ثقيل خاطري بس بكوب عصير بارد يبرد علي

عنود : وفيه ثلج

ساره : وانتي لازم تتدخلين باي شي فيه شرب واكل

عنود : ما بتموتين اذا سويتي كوب زياده

ساره : طيب

راحت ساره وجلست عنود تحارش بسطام اللي مره يرد ومره يطنش ودانه جالسه بهدوء وتراقب الورد مدت يدها بدون ما تحس وهي تتحسس الورد وفزت على ضحكة عنود المفاجأه اللي ملت الدنيا ولفت تدور وش تضحك عليه وشافت الكرسي مكسور وسطام طايح وهو يضحك بعد وكان منظره يضحك ضحكت دانه معهم وسطام اللي وقف وهو ينظف نفسه .

 

عنود : قلت لك صااير دب ما تسمع اقرب دايت

سطام : هههههه لا ما صرت دب بس انا اللي ما جلست عدل

عنود: هههههه واضح والله فات البنات

سطام كمل يضحك لكن لفت انتباهه ضحكة دانه الخفيفه اللي بانت بلحظة غلط ابتسم وهو يناظرها بهدوء صحاه من ساره اللي وقفت قباله وهي تقول : سطام العصير

اخذ سطام العصير وشربه نزله وهو يقول : ساره ابي ملابس ببدل

عنود : يااخي انت مدلع بشكل روح انت خذ ملابس محد في الغرفه

سطام : انتي وش دخلك

عنود: والله ساره تكرف تبيها تكرف معك زياده

سحبها سطام وهو يقول : اجل انتي اللي بتطلعين ملابسي طول ما انتم هنا

عنود فكت نفسها وهي تقول : الله يسامحها جدتي غلطت غلطة حياتها يوم رضعتك

سطام : لو بجلس اسمع قرقرتك ما قضينا

قطع عليهم جميله اللي جات : انا ما يصحيني الا ازعاجك انت وعنود

سطام راح لها وهو يبوس يدها: وش نسوي نبي نشوف العيون الحلوه

جميله :هههههه ايه لف الموضوع لفه

عنود : والله فاتك طاح طيحه

جميله :ههههه بسم لله عليك

سطام : ايه الحين جاء دور اخبار الcnn ما يجلس احد ما تقوله

جميله لفت لدانه: دانه كيفك الحين احسن

دانه :احسن

سطام قطب حواجبه : فيك شي؟! جميله: معاها مغص من العمليه والحين الحمدلله

سطام بخوف لاحظوه ساره وعنود : من متى؟ ليش ماقلتو لي ؟ شي يحتاج دكتور!؟

دانه بهدوء: لا عادي مر خلاص

سطام : اذا باقي تتألمين خليني اتصل في دكتور

دانه :لا احسن

جميله: يلا يلا ناموا عشان بكره تعرفون نظام عمتي

سطام ناظر ساعته : انا بطلع لفارس شوي ما مريت عليه اليوم وبرجع

جميله : لا تطول طيب !؟

سطام : ابشري

دخل سطام يبدل ملابسه ودانه وقفت وهي ضايقه من وضع شريفه اللي تحسه يخوفها

عنود : وين بتروحين ؟

دانه: بروح انام احس تعبت

ساره: زين خذي ادويتك قبل

دانه اخذت كاس مويه :طيب

طلعت وهي متجهه لغرفتها فتحت الباب ودخلت نزلت الكوب ولفت لكن الصدمه كان سطام واقف يبدل ملابسه وكان لابس بس باقي التيشيرت في يده رفع راسه وتجمد لما شافها واقفه ونقابها بيدها ولا واحد قدر انه يتدارك الوضع لحد ما انفتح الباب

٠

٠

عند عنود اللي كانت جالسه على طاولة المطبخ وساره اللي تحضر اغراض الفطور

عنود : ساره

ساره : نعم

عنود :  تفكرين باللي افكر به

ساره : وشو !!؟

عنود : موضوع دانه وسطام

ساره جلست بتعب : تكفين عنود ترا من يومين مو نايمه وانا خايفه من هواجيسي

عنود: انا اقول سطام متزوجها

شهقت ساره ونطت وهي تسكر الباب : اص اصص لا احد يسمعك والله يذبحون سطام

عنود : يا ساره فكري معي شوي شوفي كيف وضعهم وقصتهم وغير اسمها اللي هي تقول ماني متذكرته وهو يقول قريته بأسوارتها ! كيف وصل لسوارتها !؟ وين شافها .

ساره: مدري كل اللي اعرفه اني ابي اكذب حتى عيوني واصدق سطام

عنود وقفت : انا اللي بعرف وش لازم نصدق

طلعت وهي متجهه لغرفة دانه لكن شافت شريفه واقفه تقدمت بهدوء : عمه فيك شي!؟

شريفه : لا بس بشوف ذا البنت

فتحت شريفه الباب وشافت دانه واقفه ومعاها نقابه وجهها اصفر

عنود دخلت لها : دانه فيك شي

دانه اللي حست الدنيا بتطيح فوق راسها ومن حسن الحظ ان سطام دخل في الدولاب بأسرع ماعنده : هاه لا

شريفه بحده : وش فيه وجهك اصفر

دانه : ولا شي بس عمليتي ا ا عمليتي تعبانه منها

عنود : تبين اقول لسطام يجيب دكتور

دانه هزت راسها ( لا ) : لا انا بنام وباخذ الدواء بصير بخير

شريفه : عنود وينه سطام

عنود : راح لفارس

شريفه اتصلي فيه خليه يجيب الدكتور

دانه كانت ترجف بخوف وعنود اللي لفت تدور لجوالها لكن طاحت عينها على الدولاب اللي ماكان مسكر مره لفت وراء السرير وشافت ثوب سطام حست الدنيا دارت بها ومدت يدها تدخل الثوب تحت السرير بشويش ووقفت وهي تاخذ جوالها برعب ورجفه سوت نفسها تدق على سطام اللي كان يراقب الوضع برعب على دانه مو عليه غمض لما شاف جواله على السرير دق قلبه بخوف وهو يحاول يكتم انفاسه

سمع عنود تنزل الجوال : سطام مايرد

رفع سطام عينه وهو يناظر الجوال اللي كان متاكد انه مو صامت (كيف عنود اتصلت ؟؟)

شريفه : روحي دوري لمازن يناديه

دانه:انا بخير والله بس شوية تعب

عنود:عمه وش رايك انتي تروحين لمازن لاني متهاوشه معاه ومابيرد علي

شريفه :ماشاء الله

عنود:ايه وانا بهتم بدانه واساعدها والا خلي ساره تناديه

شريفه :زين

تحركت شريفه لمازن ولفت عنود بهدوء واتجهت لدولاب وشافت سطام ناظرته بنظره فهمها سطام زين وهي تناظر شكله وقالت :اطلع قبل تشوفك

بالقوه طلع سطام ووصد وهو يطلع من الغرفه وركض برا اما عنود لفت لدانه وقالت: ارتاحي عشان اذا جات شريفه ما تشك بشي

كان وجهه العنود مايتفسر من الضيق والقهر كانت ما تبي تصدق في سطام شي ..

٠

٠

وعند سطام اللي اتجه للمطبخ بضيق مر وهو مايدري وشلون يتصرف

ساره :سطام مارحت باقي

سطام لف لها وهو متوتر: كنت رايح

شريفه :سطام انت هنا

سطام لف بقوه :ايه تو جيت من عند فارس

ساره ناظرته باستغراب شريفه: طيب روح شوف طبيب دانه شكلها مريضه

سطام : ليش شفيها !

شريفه : مدري وجهها اصفر

سطام : طيب

طلع سطام وهو يفرك يده اتجه لبيت ابو فهد وهو يدق الباب بقلق انفتح الباب ودخل سطام بهدوء وجاء ابو فهد :هلا سطام

سطام : كيفك عمي

ابو فهد : كويس وانت كيفك وكيف البنت

سطام : والله جاي لك عشانها

ابو فهد : ليش

سطام: مدري متعبها جرح العمليه

ابو فهد : طيب بجي معك الحين بس خلني اشوف فهد

سطام : ليه وش فيه فهد

ابو فهد بهدوء: متهاوش مع واحد وطعنه

سطام :اييييييش

ابو فهد :لا تخاف هو بخير

سطام : وينه بشوفه

ابو فهد : تعال معي

دخل سطام وهو بعيونه يدور على فهد شافه منسدح بتعب وركض له : فهد فهد وش فيك ! مين طعنك ! وش صار

فهد : هههههه اخس طلعت تخاف علي

سطام غمض بضيق : وقت استهبالك

فهد :مافيني شي بخير والحمدلله هوشه بسيطه

سطام : مع مين

فهد : مدري واحد اعترض لي بالطريق وكان الظاهر بيسرقني بس اني تهاوشت معه

سطام : لا حول الله يالله الحمدلله انها جت بخير

فهد : الحمدلله

سطام : كيف جرحك عميق

فهد بضحك وهو يأشر بيده : نقيطه

سطام عفس وجهه ببتسامه: ياربي تعطيني روقانك في مثل ذا المواقف

ابو فهد : يلا سطام

فهد : وين

سطام بهدوء: دانه تعبانه

فهد بهت وجهه : ليش !؟

سطام : جرح عمليتها اتوقع ملتهب

فهد : زين

طلعوا متجهين لدانه

٠

٠

وعند دانه اللي كانت منسدحه بخوف وهي تشوف الكل فوق راسها ( شريفه ، ساره ، عنود ، ام مازن ، جميله )

عنود اللي كان وجهها ضايق ولاحظت ساره وهمست

ساره:وش اللي صار

عنود بضيق: بس تكفين لين ينتهي ذا الموضوع

سمعوا صوت سطام اللي كان معاه ابو فهد طلعو كلهم ودخل سطام وابو فهد وابتدء يكشف على جرحها وسطام صاد ويحاول يحصل طريقه يفهم فيها عنود

ابو فهد : سطام الجرح كويس بس ان هذا الالم عشان ابتدا يلتأم واذا استمريتي على ادويتك بالتمام ما راح يجي اسبوع الا وانتي تمام

وقف ابو فهد وهو يقول : مافي اي خطر الحمدلله

سطام : يعطيك العافيه

طلع ابو فهد والكل رجع لمكانه بعد ما طمنهم سطام

لكن سطام جلس يدور على عنود بس ما حصلها زفر بضيق وطلع متجه لبيت فارس ..

٠

٠

عند عنود اللي قالت لساره كل شي وهي كارهه ذا الموقف

ساره حطت يدها على راسها: لا يا عنود اكيد فيه شي غلط مستحيل مستحيل

عنود : المشكله ان دانه تدري ان الغرفه اللي هي فيها لسطام وسطام يدري ان دانه مستقره في الغرفه

ساره : يمكن نسوا يمكن صار شي

عنود : قسم بالله تمنيت اني ما شفت الموقف يعني دانه كانت جالسه بدون نقاب وسطام بدون تيشيرت !؟ فسري الموضوع

ساره : لا يا ربي

عنود : ان شاء الله فيه غلط بالموضوع ان شاء الله واذا كان فيه شي يكون اقل شي متزوجها

ساره : خلاص خلاص مابي افكر ..

٠

٠

عند دانه اللي انهارت ما كانت تبي تشوف هالنظره من عنود هي بسبب المها نست ان الغرفه لسطام توقعته يبدل في مكان ثاني غمضت وهي ماهي مستوعبه وش بتسوي لو شريفه شافت سطام

.

.

عند فارس دخل سطام بهدوء وهو يشوف فارس جالس كعادته يقرأ كتاب خاص لمكفوفين

سطام : سلام

فارس سكر الكتاب بسرعه : هلا هلا وينك توقعتك ما بتجي

سطام جلس وهو يتنهد : اسكت يا فارس لو تدري وش صار

فارس : وش صار ؟!

سطام شرح له كل شي وهو يفهمه ان فعلا ما توقع ان دانه بتجي للغرفه وان هذا كله بيصير

فارس بصدمه : سطام ؟ انت ملاحظ ان كل مالك تغرق

سطام : ملاحظ يا فارس بس ما بيدي حيله

فارس : كيف الحين بتقنعهم

سطام : عنود اكيد ما بتقول لاحد الا ساره

فارس : واذا درت ساره بتقلب الدنيا عليك

سطام : بكره من الصباح بكلمهم

فارس : ان شاء الله تنحل

سطام : كلمت فهد

فارس :لا

سطام : متهاوش مع واحد وطعنه

فارس : ايش سطام من جدك

سطام : اي والله كنت رايح لبيتهم ابي ابوه يشوف دانه لكن قالي ان فهد مطعون

فارس :ليش طيب

سطام : يقول انه حاول يسرقه وتعرف فهد

فارس رجع لوراء بضيق :زين انك قلت لي بكره اروح له

سطام : زين انا برجع تبي شي

فارس : لا سلامتك انتبه لنفسك وشوف وش يصير معك

سطام : زين

٠

٠

من بكره الصباح فز سطام من نومه شاف الساعه وكان متأخر ضرب جبينه بضيق ووقف وهو يبعد رجول نايف عنه لبس وغسل وطلع وهو يشوف الكل جالس وسوالف دور بعينه على البنات بس ما حصلهم وطلع متجه لهم

وقف وهو يقول : فيه احد

هديل : خلاص تغطت دانه ..

دخل سطام وشاف جوري جالسه اتجه لها وهو يحضنها: حي الله خوافتنا

جوري ابتسمت بتعب : والله من اللي شفته

ضحك سطام : يلا يلا شدي حيلك وانتقمي منه

جوري : اوريك فيه

لف وهو يدور عنود وشافها بين البنات راح وهو يحشر نفسه بجنبها

ساره بزعل حس فيه سطام : سطام افطرت والا لا

سطام : لا لا اليوم عنود هي بتسوي الفطور لي

عنود كملت فطورها بهدوء بدون ما ترد

ساره مدت له الصحن اللي بجنبها : ما يحتاج هذا هو جاهز

اخذه سطام بهدوء ولف لعنود : وهو يحط يده على كتفها : بس شكل صحن عنود اطيب

عنود بعدت يده : بعد عني ارض الله وسيعه

الكل انتبه لنبرة صوتها لكن تدارك سطام الوضع وكمل فطوره بسرعه وهو يقول : قومي معي بوريك زرعتك كيف كبرت

عنود ناظرته بهدوء : ايه شفتها وشفت كيف كبرت بشكل يخوف تخليني اكره اني اروح لها

سطام فهم ان الكلام له واخذ نفس : ترا بس عشانك شفتيها من بعيد

عنود وقفت بغضب :زين نشوفها من قريب كيف

مشى سطام وهو مبتسم وابتعدو ولفت هديل على ساره : وش فيهم متهاوشين !؟

ساره : لا بس امس طاح سطام وتعرفون عنود فكتها ضحك عليه وهو كان معصب وهاوشها وزعلت وطبعا اخذت بخاطرها

هيفاء : غريبه عنود لو يذبحها سطام ما زعلت

ناديه : اكيد انها بعد زودتها ..

كانت دانه ساكته وهي متضايقه من نظرات عنود وساره اللي تحاول ما تبين شي من ضيقها

٠

٠

عند سطام اللي كان يمشي بهدوء وما عرف كيف ينطق وقف وهو يقول : ادري معك حق بكل شي يعني الوضع ماكان بسيط عشان نفهمه بس صدقيني انتي فاهمه غلط

عنود بهدوء: مهما كان عذرك صدقني مافيه شي يقنعني الا سبب واحد وهو انك تكون متزوجها

ضحك سطام بصدمه : عنود لا تستهبلين اذا هذا كلامك وانتي تعرفيني وش بيقولون اللي ما يعرفوني

عنود : سطام انت اللي لا تستهبل اصلا كل القصه اللي قلتها محد مصدقها بس مشيينها عشان هم يبون يصدقونك وفوق هذا خوفك الغير مبرر على البنت وزياده اسمها اللي تقول انك شفته على الاسواره بسألك وش وصلك للسواره ونهايتها انت تركت كل الغرف وحطيتها بغرفتك اللي اذا احد نام فيها بالغلط سويت سالفه  وجيت امس وكأنك ماتدري انها فيها وحتى ما عطيت خبر انك بتكون فالغرفه وبعدها اجي واحصلك بذاك المنظر انت مستوعب لو شريفه شافتك وش بيصير فيكم

سطام : خلصتي ؟

عنود : مو عاجبك يعني

سطام : عنود لا تستفزيني كل اللي قلتيه ما يعطيك حق انك تتهميني اول شي مسالة الغرفه انا حطيتها باول مكان واجهني وخوفي جدا طبيعي هاذي بنت غريبه ولو يصير فيها شي برقبتنا ! وانتي تعرفين وش يعني كلامي ومن حقي اخاف وانا ادري لو حصلت اهلها بيكون صعب اني افهمهم الوضع ،اما اسمها كان صادم لي اكثر منكم كلكم ولا توقعته ومدري اذا هو اسمها او اسم احد يقرب لها والاسواره كانت بمعصمها وواضحه شفتها وقريت اللي عليها لما سألت عن اسمها والقصه هي الحقيقه وامس انا توقعت انها تعرف انها بغرفتي ولما رفضتوا قلت اكيد بيعرفوني اني فيه وانا فعلا دخلت مالي نيه ودخلوها فاجأني وهي بعد مالها ذنب

عنود : من جدك هاذي اعذارك

سطام :عنود انتي تدرين ان عمري ما بررت لاحد افعالي وانا جالس ابرر لك لاني مابي اخسرك احلف لك بربك اللي خلق الخلق اني ماعرفها ولا بينا شي وكل شي صار انتم تعرفونه فعلا حرام عليك ياعنود اتركيني انا وحطي نفسك مكان البنت وش بيصير فيها من ورا غضبك وزعلك وتفكيرك

عنود : سطام مابي اصدق عيوني ابي اصدقك بس صعب

سطام : عنود سوي اللي تبين بس لا تظلمين الدنيا تدور

عنود مسكت راسها بضيق : والله ما نمت وانا اكذب نفسي طول الليل تكفى سطام احلف ان ما بينكم شي

سطام : والله وبالله واللي خلق الكون ما بينا اي شي

عنود جلست وهي تمسح عيونها : يارب

سطام : اكيد قلتي لساره

عنود : معلوم بقولها

سطام : عنود فهميها تكفين

عنود : بفهمها بس انتبه تكفى لا تغلط مره ثانيه

سطام ابتسم لها : ابشري

 

رجعت عنود وكمل سطام للاسطبل بس وقفه صوت شريفه اللي تقول : سطام ما ودك تاخذنا للاسطبل حقك

سطام : الا حياكم

مشوا الكل له واتجهوا للاسطبل

٠

٠

 وعند فارس اللي طلع مع مؤمن متجه لبيت فهد دق الباب وفتحت له ام فهد وهي تقول : هلا فارس يمه

فارس : كيفك يا خاله الحمدلله على سلامة فهد

ام فهد : الله يسلمك ياولدي تفضل ادخل

فارس : ان شاء الله

دخل وهو يشوف فهد منسدح بتعب : سلام

فهد اعتدل : اهلين

فارس : سلامات سلامات ما تشوف شر

فهد : ما يجيك يارب

فارس : وش صار

فهد : ابد تهاوشت مع واحد كان بيسرقني اغراضي

فارس ابتسم بهدوء : متوقع يعني اني فعلا بصدق هالحكي

فهد بلع ريقه بهدوء : وليش ما تصدق ؟

فارس : لإنا عارفين كلنا انه ما كان بيسرقك

فهد : فارس من جد صار كلامك سيء ومستفز

فارس : ليش احساسي يقول ان لك علاقه بدانه

فهد : لو تسكت احساسك ابرك بكثير

فارس : مابي اضغط عليك بس صدقني مهما تخبى بيبان

فهد صد بضيق وهو ياخذ نفس فارس وقف بهدوء وهو يقول : عالعموم انتبه لنفسك

انسحب وطلع ووقف فهد وهو يهوي نفسه بألم ( من وين طلع لي ذا الفارس من وين )

٠

٠

عند دانه اللي كانت واقفه تساعد ساره دخلت عنود وهي تفكر بهدوء قربت وهي تاخذ الكوب وتشرب مويه وبعد صمت تكلمت دانه بصوت يرجف وهي تسكر الباب :بنات ادري انكم فاهمين غلط ويمكن تنظرون لي نظره سيئه بس والله مو مثل ما فكرتوا والله

عنود : وش فكرنا

دانه : ادري بكم من زمان مو مصدقين بس والله العظيم ما بينا شي والله

عنود اخذت نفس : لا تخافين سطام بعد شرح

دانه: والله ما توقعت احصله بالغرفه ابد

.ساره : دانه خلاص اهدي احنا فهمنا الموضوع بس لازم تنتبهون اكثر

عنود : اهدي خلاص هي مره وانتهت

دانه مسحت دموعها بضيق : لو اقدر اتذكر اي شي يرجعني لاهلي ما انتظرت

ساره قربت وهي تحضنها : خلاص اهدي

دخلت جوري : وش فيكم

عنود : ولا شي بس دانه شوي تعبانه

جوري : انادي سطام قبل يروح

دانه: لا انا بخير

جوري : طيب اجهزوا لان سطام راح يجيب عايشه

عنود : اووووف ناقصينها

ساره : خلاص عاد ندري انها بتجي اذا جات امها

دانه؛ مين هاذي

ساره :هاذي بنت ولد العمه شريفه

عنود : ولدها مات من زمان وبنته جلست معاها طبعا متزوجه

دانه : ليش ما تبونها تجي

جات جوري وجلست بهدوء : هو احنا مو ما نبيها تجي لا بالعكس نحبها ونبيها تجي بس احيان لقافتها وتطفلها يخرب عليها

ساره : يعني خليك حريصه وبس

دانه : زين

سمعوا صوت مازن اللي يدق الباب : سوير

ساره لفت للبنات وشافتهم متغطين : تعال مازن

دخل مازن وهو يدور بعيونه على جوري شافها وابتسم بمشاكسه : لا لا لا وش ذا الحيل انتي ما يمسك شي نطيتي على طول

جوري ابتسمت وهي ترمي عليه الملعقه :لا تفكر اني ممكن استسلم لامثالك السيئه بقوم لو طحت ما بخليك تستانس

مازن رجع لها الملعقه : بنت ابوك والله

عنود بزهق :وش تبي

مازن : انتي وش فيك

عنود : ولا شي بس وش فيك جاي

مازن : ايوه صلحوا قهوه وشاهي

ساره : خلاص نص ساعه وارجع

مازن مشى ومر من جنب جوري وضربها بالعلبه  وركض وهو يضحك ولكن جوري رمته بالملعقه وصكت براسه ولف بيهاوشها وصفق بالباب وبعد هدوء ارتفع صوت ضحك البنات عليه وقف وهو ماسك راسه : حسيبك الله يا مسممه كيف صبتيني

ضحكت جوري : المظلوم ياخذ الله بيده

مازن وقف وهو مايدري يطبطب على اي ضربه

وافترقوا كل واحد يسوي اشغاله

.

 

 وعند سطام اللي وقف بمحطه وهو يأشر للعامل انه يعبي له بنزين استند براسه على الشباك وهو يتذكر الليله اللي كانت سيئه تنهد وهو يمسح جبينه : توك بالبدايه يا سطام

تحرك وهو متجه لبيت عايشه وقف وهو يدق عليها وطلعت بسرعه وركبت وراء وهي تحشر عيالها مع سطام وهي شايله واحد وحامل وحالتها حاله نزل سطام وهو يجمع اغراضها وراء وركب ( وكانت عايشه متعوده على سطام بشكل كبير وتعتبره مثل اخوها وسطام كذلك )

عايشه : كيفك يا سطام

ابتسم لها سطام بالمرايه : الحمدلله وانتي كيفك كيف عيالك

عايشه : والله خلها على ربك يا سطام

سطام قطب حواجبه : فيك شي محتاجه شي

عايشه : مستوره

سطام :وزوجك وينه !؟

عايشه : زوجي الله يكون بعونه ذبحته هالديون

سطام هز راسه بضيق : الله يعين

عايشه : قولي انت ما حصلت وظيفه

سطام : الله كريم

عايشه من باب السوالف : عاد انت ما جربت وش المسؤوليه والعيال حسبي على اللي قطع نصيبك

اعتدل سطام وهو يكلم عيالها وكانه ماسمعها : حموده شلونك

محمد : الحمدلله

سطام : ماشاء الله صرت رجال

محمد : ايوه وبيصير عندي خيل زيك

سطام ابتسم وهو يسمع لشكاوي عايشه اللي تحاول تنبش جروحه بدون ما تحس ..

٠

٠

وعند فارس اللي كان جالس بهدوء كعادته ابتسم لما حس بيدينها على كتفه : شعندك جالس لوحدك

ضحك وهو يتحسس يدينها : لو داري تمنيت مليون

**** : ههههههه ليش

فارس : كنت اتمنى تجين وجيتي

**** : جرب مره ثانيه

فارس : وش ذا الجيه الحلوه

**** : وش اسوي وحشتني لازم اجي

فارس : بيني وبينك وحشتني عيوني

مدت يدها وهي تشد على يده بحب وكملوا سوالف اللطيفه اللي ما ينمل منها وسط فرح فارس بجيتها ..

٠

٠

وفيه مكان ثاني مكان بعيد كان اهل دانه لافين كل الدنيا يدورون عليها وقف ابوها وهو يمسح جبينه بغضب وتكلم واحد من عيال عمها ( سالم : وين راحت ذي

ابو دانه : ان شاء الله تكون ماتت ولا فضحتنا

سالم : ان شاء الله

لفوا على صوت طبيب وقفوا وهم متجهين له سالم: سلام عليكم يا دكتور

الدكتور : وعليكم السلام

سالم : كنت مناوب يوم ..... بتاريخ ... بسإلك شفت بنت مصابه باثر حادث مرت عليكم مجهولة الهويه

الدكتور قطب حواجبه بضيق : قبل ثلاث ايام مرت علي وحده مجهوله بس كان معها واحد واخذها

سالم : وش اسمه

الدكتور: للاسف عطانا كل شي عنه غلط

سالم : البنت كيف شكلها

حاول الدكتور يتذكر بس هز راسه ب انزعاج : مو متذكرها

ابو دانه مسك راسه بعصبيه: من ذا اللي اخذها

سالم : اصبر يا عم ما ندري هي هي والا لا

ابو دانه طلع وهو يدعي انها ميته ولا فضحته

٠

٠

 اما عند سند اللي كان جالس وهو هادي شاف ابوه جاي له جلس الجد بهدوء وهو ضايق وبعد حيره قال: سند اسمعني مهما كان اللي صار سطام ماله شغل اترك كل الحقد على طرف ترا انت سببت له عقده

سند بغضب : انت بس تدافع عنهم كل عيالك واقف معهم ومتهمني بالسيئه ماجد ( ابو سطام ) حطيت الحق معه وتركتوا قلبي محروق وبعدها كملتها مع صقر وما زلت تحملني مسؤولية بلاوي عيالك

نزل الجد راسه بضيق : سند كلكم عيالي وصقر ما نسيته ولا نسيت ماجد

سند : بس نسيت سند خليته على الهامش مثل ما تركت الخُبر ومشيت

راح وترك الجد في مكانه بحزن غمض عيونه بنكد وضيق من كل ذكرى سيئه ومن عياله اللي ما يعرفون وش يعني اخوّه..

٠

٠

عند سطام وصل ببتسامه ونزل وهو يشوف الكل ينتظر عايشه بأمر شريفه اخذ منها ولدها الصغير النايم ووقف ينتظرها تسلم وابتدوء يسلمون عليها اتجه سطام بجهة ساره وهو يسلمها الولد ورجع ينزل الاغراض وهو يحاول يتجاهل عيون سند اللي تقدح بالشر والحقد عليه

وقف بحيره بجنب سيارته وهو مخنوق يبي يعرف وش ذا السور الكبير اللي بينهم مد يده بهدوء لدقنه وهو يمسح عليه بحزن واخذ الاغراض وجلس شاف مازن جالس وهو جبينه منفوخ قطب ببتسامه وهو يأشر له ( وش ذا )

مازن حول عيونه على الجوري بغضب وضحك سطام ويهز راسه بيأس من وضعهم

وكانت عايشه مو محتاجه احد يسايرها بالسوالف كانت تسال وتجاوب بنفسها وتضحك وتسولف واكله الجو

والكل كان يكافح النوم بسبب سوالفها وما صدقوا تعشوا والكل طار لفراشه ينام بدون ما احد ينتظر احد

لكن دانه جفاها النوم وهي تدور اي طريقه تتذكر اهلها فيهم طلعت وجلست عند الورد بس شافت ممر كله ورد ونست نفسها وهي تمشي وتحاول تتذكر ..

٠

٠

وسطام اللي كان يتقلب بفراشه وهو ميت نوم بس من قادر يرتاح وهو ما عرف وش بين ابوه وسند جلس وهو ياخذ نفس وقف وهو يطلع برا فتح يدينه للهواء تقدم يمشي بدون جزمه ارتعش لما حس البرد اجتاح جسمه شد على نفسه وهو يكمل طريقه ووصلت به رجوله للورد وشاف وحده واقفه تقدم وهو يقول : سوير شعندك صاحيه ؟

دانه ارتبكت ولفت وهي تغطي وجهها وبخوف : انا دانه

رجع سطام لوراء بإحراج : اسف

دانه هزت راسه بهدوء وابتعدت عن الورد واسرعت بتروح بس وقفها سطام : دانه

دانه غمضت عيونها من صوته اللي صح تعودت عليه بس باقي نبرته تخوفها

سطام : انا اسف على الموقف اللي مرينا فيه ادري عنود ممكن تكون ضايقتك شوي بس الموضوع صعب من بدايته لا تخافين انا فهمتها وشرحت لها كل شي

دانه بالقوه نطقت : والله اني ما كنت ادري انك هناك

سطام قاطعها : مو مشكله محد فينا كان يدري وكانت غلطة انتهت خلاص

دانه سكتت بخجل وقال سطام : كيف جرحك كويس ما يألمك

دانه : يعني

سطام : تحسين بشي

دانه : لا بس كذا يألمني بطني كل فتره

سطام : مو مشكله عشان جرحك جديد

عم السكوت وسطام واقف دانه انسحبت بس لفت انتباهها سطام اللي واقف بدون جزمه والجو بارد كانت بتتكلم بس خافت وقفت بعيد وهي تراقبه

تقدم سطام للورد وهو مبتسم تركها وهو يشد على نفسه وبسرعه رجع للمجلس دخل بفراشه واخذه النوم وهو يحس انه مرتاح

٠

٠

ورجعت دانه للغرفه دخلت وهي مو قادره تنام سكرت الباب وهي تلف تناظر الغرفه كانت هاديه مثل صاحبها لكن فيها كركبه تقدمت للمكتبه الصغيره وهي تشوف عليها اشياء غريبه لواحد مثل سطام فتحت الدرج وشافت اوراق كثيره مشخبطه شي رسم وشي شعر واشياء كثير ناقصه ومن بينهم كم صوره مدت يدها لصوره مو واضحه كثير بس كانت لعايله صغيره ابتسمت وهي تتذكر كلام ساره ان ابوه وامه متوفين رجعتها بهدوء وسحبت دفتر كان مكتوب فيه اكثر من بيت شعر وفيه قصيده هزت دانه بكل حرف ومعنى

(هنا كم سنه من عمري اعيش وداخلي جروح

هنا قلبي رحل عني وكثر الحزن قاسيته

هنا جرحي ترك دفتر مسجل به الم مفتوح

هنا قلبي رفض بعدك وغصب البعد خاويته

دخيلك ليه يايمه خنقتي صوتي المبحوح

دخيلك كيف هالدنيا تذل الشخص في بيته

كبيره صدمه الدنيا تجازيني كثير النوح

يكون آخرها حرماني من اغلى حب حسيته

فمان الله يايمه فمان اللي عطى هالروح

 وداعك يصرخ بروحي وانا بالقلب خبيته

...

ياقبر ابوي اذا تسمح بجيلك لابغيت ابوح

بجيلك لانفذ صبري واحس العمر مليته

بجيلك واجلس اقبالك واحط ايدي على هاللوح

واحس ايدي بيدين ابوي ياليته صدق ياليته) .

.

هنا رمت الدفتر بالدرج وهي منهاره كان الكلام كبير كبير عليها هي تدري ان فراق الوالدين صعب بس كانت القصيده ما تعني بس فراقهم اشياء كثيره مخباه فيها ابتعدت وهي ترجع لفراشها وانهارت تبكي وهي ما تدري لو هي زادت على مصايب سطام مصايب

٠

٠

ومن بكره فتح سطام عيونه على صراخ عايشه اللي تضرب ولدها وتهاوشه والثاني يبكي بجنبها فز وهو مفجوع : عايشه وش فيك عليه

عايشه بعدت سطام وهي ترمي الجزمه : والله لاوريك يا كلب

سطام : عايشه وش بك

محمد اللي مسك في سطام وهو يبكي وصرخت عايشه : تبكي تبكي بعد

سطام : لا حول ولا قوة الا بالله يا بنت الناس اصبري وش بلاك

عايشه : مطيح اخوه على الارض لو مات وش اسوي به

سطام ارتخى بهدوء: عايشه خلاص اخذي الصغير بدل ماهو جالس يبكي واتركي هالمسكين

عايشه : هين نتفاهم يا حيوان

بعدت وهي تاخذ الولد الصغير وجلس سطام وهو ياخذ محمد بجنبه : وش مسوي انت خليتها تقلب علينا

محمد وهو يمسح دموعه: بس اخذت الولد عشان يبكي وطاح

سطام : خلاص هان الموضوع وان شاء الله سهالات خلها تهداء واعتذر منها

مازن دخل وهو يضحك: محمد الحمدلله على السلامه ماجور

سطام ابتسم وهو يمسح على راسه المصدع

نايف : والله اني انخرشت قلت الحين بتلف علي وتكمل

سطام: والله فجعتني

مازن: احب افجعك زود واقولك ان سند وشريفه راحوا للاسطبل وشكلها هاجه بهم

سطام: وش يبون هناك

نايف : تجمعوا اخيس اثنين بيقلبون الدنيا اكيد

انسدح سطام بتعب : والله عاد شكلي بستسلم

مازن: لا تقول بس بترجع تنام

سطام : ياخي ماسكني صداع يفجع

نايف : انا اقولك من النوم

مازن : لا لا من الازعاج والتفكير

سطام رجع لفراشه وهو يتغطى : مدري بس اتوقع لو نمت با ارتاح

نايف : شكلي حتى انا بنام

مازن سحب نايف قبل ينسدح:  لا لا تكفى تعال بنروح نسوي اي شي

نايف ابتسم بمكر: وش رايك نحوس البنات

مازن : لا لا جوري مريضه وبعدين شريفه بتحوسنا

نايف: انت ليش خواف

مازن: والله تبت بعد اللي صار

سطام : روحوا تناقشوا بعيد الله يهديكم

نايف ناظر بمازن وابتسم بهدوء وسحب مازن برا رفع راسه سطام واستغرب انهم طلعوا بس ما ركز ورمى نفسه بتعب

٠

٠

عند البنات كانت دانه جالسه بتعب وهي تهوي نفسها والبنات موزعين بالمطبخ

هديل وهي تشرب عصير : شريفه راحت الاسطبل

ساره : سألتك بالله

ناديه : شتبي فيه يعني

هيفاء : ماعندهم شغل بيدورون شي يغث سطام اكيد

جوري : صدق وينه سطام ما شفناه من الصباح

عنود : اتوقع انه مو موجود لو موجود ما نام كل هالوقت

ساره : مدري حتى ما مر ولا اخذ ملابس ولا حتى عطاني خبر

دانه وقفت بتعب وطلعت وهي تسمع نقاشات البنات عن سطام جلست برا وهي تحس انها تعبانه ومتنكده من دفتر سطام اللي قرأته ولكن فجعها اللي جلس جنبها بقوه

عايشه : انتي مين ! وش جابك هنا ؟ من وين تعرفين سطام

دانه خافت منها ولا عرفت ترد بس انقذها عنود اللي جت وهي تسحب عايشه : عايشه لا تضايقين البنت اكثر تعالي انا اقولك

عايشه : وليش هي ما تقول

عنود بحده: البنت تعبانه

سحبتها وهي تبتسم لدانه وراحت بعيد وهي تشرح لعايشه اللي عجزت تتقبل : مستحيل وش ذا القصه لا يكون سطام متزوجها

عنود بقلة صبر : لا متزوجها ولا شي حتى شريفه راضيه فيها ولا تنبشين اكثر وتضايقين سطام

راحت وتركتها ولكن عايشه ما اقتنعت ومصره تنبش اكثر ..

٠

٠

عند ابو مازن اللي كان جالس بزوايه وهو معاه جواله ويكلم : ايوه يا ابو خالد وش صار على موضوعنا

ابو خالد : يا ابو مازن هذاني مشغل بحثي لقيت عنه بعض الاخبار بس ما تطمن ابد خلني اكمل اسبوع وبعدها بشوف

ابو مازن بضيق : تكفى لا تقصر سوي اللي تسوي اهم شي شف لي كل شي عنه

ابو خالد : ابشر ابشر

سكر ابو مازن بضيق ووقف وهو يهز راسه بأسى : ليتني اقدر ارجع السنين واصلح كل شي

٠

٠

اما عند مازن ونايف اللي كانوا واقفين برا المجلس وبدون سابق انذار ركض نايف ودخل وهو يصرخ: سطام الحق الحق ( السطام .. هذا اسم فرس سطام اللي يحبه حيل مسميه بأسمه ولا يرضى عليه اي شي )

فز سطام : وش فيه وش فيه

نايف : رماه سند بالرصاص ..

اتسعت عيون سطام برعب وفز يركض لباب ولكن فاجئه مازن بسطل مويه بارده وثلج شهق وهو يلف ولكن ما خلص اللي صار و واجهه نايف بالبخاخ الثلجي .

ماقدر سطام حتى يصرخ من البخاخ اللي معبي وجهه جلس باقرب مكان وهو يمسح وجهه بغضب وصرخ : تستهبل يا غبي انت وياه

مازن اللي كان بعيد وهو يضحك : هاردلك يا كابتن

نايف : هههههه عشان تتوب تنام واحنا هنا

سطام اللي يكح من البخاخ وقف وهو متجه لدورات المياه بغضب وهو يسب ويلعن فيهم وهم يضحكون غسل وجهه وطلع متجه لساره وقف قريب المطبخ وهو يقول بصوت مكتوم : سااره ساره وينك

ما ردت ساره رجع سطام ينادي بس محد رد عليه ونادى لاخر مره وطلعت دانه بهدوء : ساره عند جدك

ما سمع سطام كلامها لانه انخنق من البخاخ والمويه البارده والبرد وطاح جنب دانه اللي شهقت برعب وهي مفجوعه ماعرفت وش تسوي نزلت له وهي تهزه بس ما رد وهو يحاول ياخذ نفس ركضت برعب وهي تدور على اي وحده وشافت عنود وساره جايين يضحكون

دانه وعيونها مليانه دموع : سطام سطام طاح هناك

ساره ناظرتها بخوف وركضت على المكان اللي تأشر عليه دانه وعنود ركضت قبلهم بخوف

صرخت عنود وهي ترفع سطام : ساره جيبي مويه

ركضت ساره وهي تجيب مويه مدتها لسطام اللي بالقوه قدر يشرب

ساره بخوف : سطام وش فيك وش ذا اللي عليك سطام

غمض سطام ياخذ نفس وكان يرجف من الجو البارد

رجعت دانه وهي معاها لحاف : لحفوه شوفوا يرجف

سحبته عنود وهي تلحف سطام اللي كان ياخذ نفس ورا بعض مخلوطه بشهقات مكتوم

سندته عنود على رجولها وهي تضرب خده : سطام

سطام فتح عيونه بشويش وهو يقول : الله يصيبهم

ساره: تحتاج مستشفى

سطام هز راسه ب ( لا ) : جيبي لي ملابس بسرعه

ركضت ساره تجيب الملابس وعنود سندت سطام جوا رجعت وهي تعطيه ملابسه راح الغرفه وهو يبدل بتعب وارتمى على السرير وهو يحس بصداع  دخلت عنود : سطام انت بخير

سطام بصوت متقطع : بخير بخير

ساره : وش صار

سطام : هالحمير اللي برا

عنود : مين !

شرح لهم سطام السالفه ولا استثناء الصداع اللي فجر راسه بالكامل ومع الفجعه والمويه البارده داخ ويحس الصداع زاد

عنود بحده : شكلهم حلا لهم اللعب بالناس امس جوري واليوم انت

ساره وقفت بغضب : وش ذا الغباء احد يصحي احد بذا الطريقه ولا مويه بارده وثلج بعز البرد يستهبلون اكيد

سطام : هو لو اني صاحي وماني تعبان ارحم

عنود وقفت وطلعت وساره وراها حاول سطام يناديهم بس طلعوا

رجع انسدح بتعب وهو ياخذ نفس بس هاجتمه ريحه غريبه عليه بالمخده رجع يشمها وكانت ماهي لساره ولا لعنود ولا لباقي البنات حس احد دخل ولف وشاف دانه واقفه ومعاها كوب قالت بتوتر : هذا شاهي اشربه عشان يدفا جسمك

اخذه سطام وهم مبتسم لها: يعطيك العافيه

دانه : يعافيك

طلعت وتركته ولكن رجعت نفس الريحه للكوب رفعها سطام وهو يدور لريحه وكانت مكان يدين دانه ابتسم ولا شعوريا سرح وانكب الشاهي صرخ وهي يبعده بألم مسح وجهه بسرعه وهو يلعن في ذا اليوم اللي بالنسبه له مشؤم

٠

٠

عند مازن اللي كان مازال يضحك هو ونايف انقطع ضحكه لما سمع ساره تقول بغضب : ماشاء الله تضحكون ومبسوطين

عنود : ايه هي صارت عاده عندكم

مازن : خير وش فيكم مشتطين

ساره : وش ذا اللي مسوينه في سطام

نايف : ايه جات امه جات الكابتن والمحامي الخاص لسطام

عنود : فكنا من خفة دمك تكفى اكيد كل شي من تحت راسك

مازن : عنود خير وش فيك

عنود : انتم اغبياء تكبون مويه بارده وثلج في البرد وعلى انسان صاحي من النوم وتعبان ولا بعد بخاخ ثلج

نايف : انتم وش عليكم هو راضي

ساره : من قالك راضي يا فالح هذا هو طايح هناك مكتوم ويرجف وحالته حاله

مازن على باله يمزحون : ههههاي نصابات عيني عيننك

عنود اللي كان واضح الغضب عليها : قسم بالله لقول لجدي اعلمكم النصب جد

لفت وهي معصبه واتجهت لجدها اللي جالس ومعاه جميله وابو مازن وعايشه

عنود : جدي تصرف مع هالاثنين

الجد : وش فيه يا بنتي

ابو مازن : وش فيه يا عنود

مازن جاء يركض : يبه ماعليك منها هبله

عنود : اقول ابعد يبه مازن ونايف ...... وقالت كل السالفه

ابو مازن بغضب : انت صاحي انت وياه وش ذا

الجد برعب : سطام وينه وينه

عنود : هذا هو بغرفته دخلناه ولبس وهو بخير

تركهم الجد وركض لسطام وواجهه سند: يبه وش فيك

الجد ما رد ولف سند:وش فيه

مازن راح وراء الجد ولحقه نايف وابو مازن والكل وراه وراحت شريفه معاهم

٠

٠

وعند فهد اللي طلع وهو يمشي بهدوء متجه لبيت فارس وقف بتردد وهي ما يدري كيف يبدا بس دخل بخوف وشاف فارس جالس وهو يسمع الاخبار

قصر الصوت وهو يقول : ابو الفوارس .

فارس لف لصوت ببتسامه : حيه تعال تعال وشوله طالع وجرحك طري

فهد : جيت اكحل عيوني فيك

فارس ضحك : ايه  ايه صدقتك على طول

فهد : مشكلتك انك دايم ما تثق فيني

فارس : مشكلتي اعرفك بزياده

فهد سكت وهو يمسح على رجله بهدوء وقال فارس : اتوقع جاي تقول وش تعرف دانه

فهد لاخر لحظه تردد : لا انت ليش مصر اني اعرفها

فارس : فهد انا اعرفك عمرك ما اختبصت كذا الا وراك مصيبه

فهد : مافيني شي يا فارس بس شوي مضايقني موضوع الزواج واهلي

فارس : اي زواج ؟!

فهد : يعني انت تدري ان ابوي بيموت ويزوجني وانا ماني مستعد مقدر

فارس حس ان الموضوع كبير : طيب ليش ما تقدر

فهد : انت تدري اني مقدر اول شي انا احب البنات احب اغير مقدر اظلم بنت الناس ابي لين اركد من راسي واتزوج

فارس رجع لورا بقرف : انت ما تستحي من نفسك وانت تقول كذا

فهد :طيب هاذي الحقيقه

فارس : والله انت تعرف رائي في ذا الموضوع

فهد ابتسم لانه قدر يتجاوز فارس : ايه عشان كذا ضايق وادري سطام مو فاضي لي

فارس : والله عاد حط عقلك براسك ودبر امرك احسن

فهد سكت وهو يوقف : انا برجع للبيت لا تنخلع امي علي

فارس رجع للاخبار: الله معك ..

٠

٠

 وعند سطام اللي الكل كان عنده وطمنهم انه بخير ومجرد صداع زاد عليه من الفجعه

الجد : وصداع من ايش

سطام : يا جدي بسيطه يمكن عشاني ما نمت والا بداية انفلونزا والا شي بسيط

الجد لف بغضب لنايف ومازن : تحسبون انكم بتطلعون منها بسلامه انت وياه

مازن : ياجدي كنا نمزح عادي وهذا هو بخير

ابو مازن : تمزح ! اعنبوك وش ذا المزح

عنود : والله لازم يتعاقبون

مازن لف لها بغضب : انتي اسكتي

الجد وهو يأشر لنايف : اسمعني انت انا ادري انها كلها من تحت راسك وجزاء لكم بتنثبرون في المجلس بدون لحاف ولا اي شي يدفي عشان تعرفون ان الله حق

نايف اتسعت عيونه بصدمه : لا يا جدي وش ذا حرام عليك برد

جميله بغضب وهي حاضنه سطام : حرام ؟! توك تعرف انه حرام ما قلته يوم كبيته على سطام

مازن بغضب وضح على وجهه وطلع وهو متجه للمجلس بس وقفه صوت شريفه : كل واحد ينحبس في مجلس لحاله

نايف : لا عاد مو لذا الدرجه

طلع مازن مكمل طريقه ونايف اللي سوا ازمه بس محد عطاه وجهه كل واحد دخل مكان واتسكر عليه فيه

٠

٠

في مكان بعيد لكنه بنفس الوقت قريب في خرابه مظلمه يهزها صوت ضحك شباب وغناء وقف واحد من الشباب وهو يقول بصوت عالي : الا ما قلتوا لي للحين فهد ما رضخ

رد عليه واحد ثاني : هههههه لا خايف دلوع امه يقول انه مب داشر

وهنا اعتلى صوت ضحكة شخص رفع سكينه اللي للحين عليها اثر دم فهد : يمكن يصحصح اذا شاف دمه

تجمعوا عليه وهم يناظرون السكين بصدمه : وش ذا

**** : ابد تطاول علي وادبته

**** : لايكون مات

**** : هههههه لا بعده حي بس في وكره

رجعوا كلهم لاوضاعهم وجلس هذا الشخص وهو يقلب سكينه وكإنه يقلب فيها مصير اشياء كثيره

٠

٠

 ومر الوقت وكانت اجواء الكل عاديه عند البنات كانت عنود وساره ودانه جالسين يتقهوون وهيفاء وهديل يلعبون لودو ستار وناديه تقرا كتاب

والحريم بجلستهم الهاديه اللطيفه وسوالفهم اللي عن الماضي

اما الرجال ومعاهم شريفه كان مجلسهم عباره عن اخبار واحوال العالم

وفي المجلس كان مازن جالس لحاله بطفش وهو يحس نفسه بيجمد من البرد لف بسرعه لما حس احد يدق الشباك بسرعه واختفى وقف وهو يتجه لشباك فتحه وشاف لحاف معلق بالحديده سحبه ودخله وشاف كوب فيه حليب اخذه بشويش ونزله ومعه شاف مكتوب ورقه ( اتوقع يكفيك عقاب ) قطب حواجبه بس ابتسم لما توقع انها عنود او ساره جلس وهو يتلحف واخذ الكوب وفك الشباك شوي بحيث ما احد يشوفه بس عشان يتغير الجو شوي بس لفت انتباهه احد يركض من تحت الشباك للشجره دقق بنظره كويس وشاف جوري ضحك بصدمه وهو ينزل الكوب ورفع الورقه وهو يشوف الخط كأنه شوي غريب عليه رجع لمكانه وهو يناظر الكوب :  لايكون حاطه فيه شي

ضحك من كلامه لكن قرر انه يشربه مهما كان لانه من جد متجمد ولانه ما توقع جوري تسوي له شي خصوصا بذا الوضع .

٠

٠

اما جوري اللي رجعت وهي مبتسمه هي اعطت مازن عادي لانها تدري ان نايف هو السبب ومن طرف ثاني كانت تبتسم على اللي بيصير بمازن بعد ما يشرب الحليب

ضحكت وهي تناظر العلبه اللي بيدها وكانت ( حبوب مسهله اكرمكم الله )

دخلت للبنات وهي مبتسمه : هااه وش تسوون

عنود لفت لها : انتي وينك !؟

جوري : رحت اخلص اغراض ابوي قبل ينبرش علي تعرفونه الله يهديه

هديل : اقولك تعالي العبي معنا

جوري : كيف حماس ولا !

هيفاء : والله نار

ناديه : مدري وش عاجبكم في ذا اللعبه

هديل : ما اعجبتك لانك نفسيه يا قلبي

ناديه : اقول وخري بس

جوري جلست : هاه كيفه سطام الحين

ساره: للحين نايم ما صحى

عنود : ما اتوقع يصحى الحين اصلا شكله بيكمل لبكره

سااره ناظرت ساعتها: ما اتوقع سطام مايحب النوم كثير

عنود : هذا اذا صار مو تعبان

ناديه : ايه صادقه

وقفت عنود وهي تصلح شعرها : نطلع نمشي

ساره : خليني اشوف جدي قبل

ناديه: والله مالي حيل

دانه وقفت : انا اروح معك

عنود اخذت جاكيتها ولبسته ولفت ودانه لبست وطلعوا وابتعدوا قالت عنود بتردد: دانه ما تتذكرين اهلك

دانه : لا من فتره احاول بس ما اتذكر

عنود : طيب وش تتذكرين قبل تجين

دانه غمضت لما تذكرت الشباب واللي صار وسطام اللي قالها كل شي اخذت نفس :ما تذكر الا جيتي هنا

عنود سكتت وقالت دانه : اسالك شي ما تزعلين

عنود : قولي

دانه بتردد : يعني بسألك وش قصة سطام وليش دايم مشاكل مع سند

عنود جلست وهي تشد جاكيتها : ابد كل القضيه ان سطام عاطل

دانه: ليش هو كم عمره

عنود : عمره 26؟

دانه: طيب ليش ما توظف

عنود : الله يرحم اللي كان السبب

دانه بفضول : مين ابوه !

عنود : لا ، جدتي

سكتت دانه وهي ودها تعرف السالفه بس متفشله لكن عنود  قالت : لما توفى عمي الله يرحمه كانت اوراق سطام معاه بالحادث كل شي هويته وكل شي يخصه وطبعا امه بعد ماتت ، حاول ابوي وجدي يطلعون له اوراق بس تعرفين الدوائر الحكوميه والمماطله وبعد فتره جدتي قالت انها مو مهمه لو يبي سطام شي يكمل بأوراق عمي صقر اللي كان معها بالحادث واللي هو اصلا قد سطام وطبعا مشت الامور بذي الطريقه وباقي جدتي مصره ان سطام بيمشي بأوراق صقر وقدر يمشي بس لما صار بالمتوسط انتهى ذا الحل ولما رجعوا يراجعون له كذبوهم الدوائر وان سطام هذا من سنين منقطع ولا راجع معناته مو موجود والحين صقر ميت وتوقف كل شي معه حتى دراسة سطام ومن هنا لهناك محد قدر يرجع اوراق سطام وكان الضغط من جدتي وعمي سند على جدي خلاه ينسى ان هالاوراق مهمه وجلس جدي يربي سطام باسم بس بين هالمزارع وللحين اوراقه معلقه ومحد يدري بها وفوق ذا يلومونه اذا ماله هويه واذا ما توظف

دانه : ماني فاهمه جدتك ليش سوت كذا ؟!

عنود : كانت تقول ما تبي اهل ام سطام ياخذون سطام عندهم ! عذرها مو مقنع بس مدري وش السبب اللي خلاها تبرر كذا

دانه سكتت بحيره ولكن عنود قالت : بس اتوقع انها كانت بتعوض سند وتسمع كلامه على حساب مصلحه سطام

دانه : شلون !؟

عنود : كانت تحس انها ظلمت سند وكان سند مقاطعها ولكن بعد ما توفى عمي رجع وقررت انها تكون بصفه بس للاسف حاست حياة انسان

دانه: ليش وش سوت له

عنود : سالفه طويله ، بس سند رغم انه كان السبب الا انه يضغط على سطام بكل قوته عشان كذا دايم هواش

سكتت دانه بهدوء وهي ماتدري وش تقول عن حياة سطام

٠

٠

اما ساره اللي كانت تدور لجدها بس توقعته جالس في الاسطبل وطلعت متجهه له وهي تنادي بس ما سمعت احد رد جلست وهي تعبانه: وين راح جدي !

وفي طرف ثاني من الاسطبل دخل فهد وهو يبي سطام ويدري محد يجي هنا الا سطام دخل وهو يمشى شوي شوي رفع راسه لما سمع صوت لكن تعلقت عيونه بالبنت اللي واقفه وهي واضح انها تعبانه من المشي قطب حواجبه وهو يدقق فيها كانت غريبه عليه شافها وقفت ورجعت من طريقها

رجع لوراء : مين هاذي ؟! معقوله تكون دانه ! الا هي اكيد ،هاذي غريبه ما تشبهه ابد ! والله اذا كنتي دانه بتكونين فرصه عمر

رجع من طريقه وهو مبتسم انه اخيرا حصل حل ..

٠

٠

اما عند سطام اللي فتح عيونه بهدوء وهو يحس الصداع خف اخذ نفس لكن تجدد مع النفس الريحه الحلوه اللي كانت بفراشه وقف وهو يتجه لدولاب اخذ ملابس وراح يبدل ويتروش عشان يصحى طلع بعد ما انتهى واتجه للمطبخ دق الباب بخفه : فيه احد

عنود : قامت الدنيا

ضحك سطام وهو يدخل : كيف بس والشمس غايبه

جوري بضحك: والله من اربع ساعات شمس للواقع

لف لها سطام بطرف عين : احب اقولك انك ضد الثقة في النفس

هديل نطت جنبه : اترك الواقع والشمس وتكفى بنروح الاسطبل

سطام اتكى وهو يدور بعيونه : وين سوير

هديل دقته من كتفه : فيه انسانه تتكلم

سطام رفع جوالها لوجهها : شوفي الساعه ي انسانه قبل

ناديه دخلت : اوه سطام صحى ما بغيت

هيفاء ركضت لما سمعت صوته : يا جعل ما يصحى غيرك زهقنا صراحه وانت نايم

ابتسم سطام : شكرا للمشاعر الجياشه بس وش المطلوب

عايشه وهي تاخذ نفس وتهوي نفسها: يبونك تاخذهم تمشيهم

عنود زفرت بضيق : يا شينك كنا بنقوله بشويش

سطام :ههههه طيب وين مازن ونايف

هديل : للحين تحت العقوبه

سطام لف للعنود بعتب : عنود الله يهديك وشوله مكبرتها كان مزح

عنود بحده : والله يمزحون مثل الناس

سطام : طيب خلوني اشوفهم واكل لي شي وبعدها نشوف

اتجه للباب بس ضرب جبينه بنسيان :اوووه

عنود : شفيك !

سطام : اتوقع ان اليوم مره تأخر الوقت

هديل : لا تكفى

سطام : والله باقي فهد بروح له تعبان وفارس وحوسه الفجريه اطلعكم

عنود : بس الفجر بيهاوش سند

سطام : لا ماعليك بس الحين وين ساره

هيفاء بطرف عين : اتوقع مامتك يا بيبي مع دانه

سطام رمى عليها المكنسه بمزح: ظريفه الله يخليك لامك

طلع وهو يدور عليهم ابتسم لما سمع صوتهم عند الورد قال من بعيد : سوير

 ساره : سطام صحيت تعال تعال

سطام دخل : صار لي ساعه ادور عليك

ساره: كنت مع دانه شوي تعبانه

سطام لف لها : وش فيك !

دانه بخوف : الم بسيط ويعدي

سطام : محتاجه مستشفى

دانه: لا حاجه بسيطه ما تنذكر

ساره : انت قولي وش بغيت

سطام وعينه على دانه : اي شي ينأكل

ساره : زين الحين احضر

طلعت ساره وبقى سطام وهو يشوف تحركات دانه اللي توضح انها مره تعبانه قرب وهو يقول : دانه اذا مره تعبانه لا تسكتين

دانه ناظرت فيه بخوف : شوية مغص بيخف مع الوقت

ووقف وراحت وللحين سطام يناظرها تحرك بقلق وراح يشوف جده دخل الديوانيه بصوت عالي : سلام عليكم

الكل : عليكم السلام

وقفت له جميله وهي تمسح على كتفه: كيفك الحين

سطام ابتسم وهو يبوس يدها : عال العال

الجد : كأنك تأخرت في النومه

سند بنظرات حاده: وش وراه يعني لا شغل ولا مشغله

سطام جلس جنب جده متجاهل كلام سند : يعني تاخرت شوي بس فادني بالصداع

جميله: اكلت شي يا يمه

سطام : الحين ساره تجيب الاكل ارتاحي انتي

وهنا قطع عليهم دق الباب القوي لفو للمجلس وفز ابو مازن مسرع له : مازن وش فيك

مازن وهو ماسك بطنه بألم : افتحوا الباب بسرعه

الجد ركض وهو يفتح : وش فيك

شريفه : مازنوه ان طلعت كذاب

ما كملت كلمتها الا مازن شطفها ركض الحمام

ام مازن : يمه ولدي وش فيه

سند : حيله

جميله: شوفوا نايف لايكون فيه شي

ركضوا لنايف اللي كان بسابع نومه ولا هو داري عن اي احد

جميله : نايف نااايف نااايف

تحرك نايف بانزعاج ولف لجهته الثانيه متجاهل الصوت

سطام حركه برجله وفتح نايف عيونه : خير

سطام : معليش ع الازعاج يعني بس انت حي والا ميت

نايف مارد وغفى ضحك سطام وهو يقول : سليم سليم

رجعوا الكل ينتظرون مازن اللي طول وراح سطام :مازن وش فيك

مازن وهو يتحسب بصدره ( الله لا يسامحك يا جوري بس طيب مردوده )

وبعد انتظار طلع مازن وقف ابوه : مازن وش فيك

مازن وهو يناظر جوري بحده : شكلي صابني نزلت برد

جمليه: تستاهل هذا فعل يدك

ما رد مازن اللي رجع للحمام وجلس سطام ببتسامه نصر وجات ساره معاها الاكل نزلته عند سطام

سند : انتي هاذي حياتك متطلقه عشان تخدمين سطام

رفع راسه سطام بحده : كونها مطلقه هذا شي مايعيبها

سند : ضحكتني والله طبعا هذا مو فارق معك الانك تعتبر في نفس وضعها

ابو مازن : سند الين هنا وبس عاد

سند : وش عندك انت بعد والا باقي شي ما ذوقتوني اياه بتكملونه

سطام نزل الكوب من يده بغضب : وش اللي ذقته وجالس تعيده كل مره علينا عندك شي قوله بوضوح

الجد وقف بخوف : سطام سطاااام اطلع من هنا يا ولدي اطلع اترك المشاكل

سطام بإنفعال مقهور : ابي افهم وش اللي صار يا جدي

سند : تبي تعرف سواد وجه ابوك

وقطع كل الكلام صوت اللي دخل وقال ببحه فيها من القهر مافي صوت سطام : وانت من يقول عن سواد وجهك

هنا كل الانظار تحولت له وعيون تسال ( مين هذا ؟ ) وعيون تقول ( وش جابه ؟! ) وعيون تقول ( هذا المستحيل )؟

٠

٠

وعند فارس اللي كان واقف بعز البرد ينتظرها تجي ( عيونه) سمع صوت مؤمن يقول : فارس مافيه يجي اليوم

لف له بصدمه: وش دراك

مؤمن : انا يجيب اغراض من بقاله انا شوف سند سوي جنان صوت عالي مره

فارس : ليش ؟

مؤمن : والله مافي يدري

فارس رجع بضيق لمكانه وهو مايدري متى ينتهي موال سند

فز لما سمع دق الباب بس خابت اماله لما سمع صوت ابوه

ابو فارس نزل الاغراض اللي بيده وهو يقول : تعالي يا اسماء

فارس وقف بذهول : اسماء

ابو فارس : هاذي اسماء يا فارس

فارس بهدوء يخالطه شوق : لا تخافون باقي ما نسيتها للحين اذكر اختي

اسماء تقدمت بضيق : انا اسفه يا فارس

ما انتظر فارس اعتذارها وتقدم وهو يدور عليها بيده حضنها لانه فعلاً محتاج احد

اسماء : ادري قطعتك بس تكفى اعذرني

فارس وهو يتحسس وجهها : ما زعلت منك لا تعتذرين ولا سويتي شي ابد معك حق في كل شي

ابو فارس : دامك مسامحها خلها عندك وانا مسافر

ضحك فارس بأستهزاء : بستغرب اصلا لو جلست على انك ابو

طلع ابوه تركهم وراه ورجع فارس لاسماء : وش صار ليش جابك مو كان رافض

اسماء بحزن : زوجته ما تبيني

فارس بقهر: يجي لها يوم يجي لها يوم ( اسماء : اخت فارس بس ابوها اخذها من فتره من امها ورفض يخليها عند فارس )

فارس :ماهي مأذيتك صح

ابتسمت اسماء بقهر وهي تشوف الحرق اللي بيدها : ابد كنت مرتاحه

فارس : صوتك ما يقول كذا

اسماء : لا تخاف علي انا اختك ما اسكت على حقي

ضحك فارس بحزن: لا عاد هنا ادري انها اذتك فعلاً

اسماء : خلاص انتهت الحمدلله المهم قولي وش اخبارك

كان فارس يسرد لها كل شي ما عدا سره اللي مخبيه عن الكل سر (عيونه )

٠

٠

في بيت الجد الكل كان واقف منتظر هالشخص يعرف على نفسه لكن سند اسرع وهو يسحبه ويطلع برا : انت وش جابك هنا اطلع من هنا اطلع

 **** : لا تفكر اني بسمح لك تعيد اللي سويته

سند :اقولك اطلع من هنا لا تذبح ابوي

**** : لا والله ماذبحته افعالك قبل

ابو مازن: انت كيف وصلت هنا

**** لف يناظره بهدوء وهو مبتسم : ما اتوقع اني كفرت لاني جيت اشوف ابوي

ابو مازن : لا تضر ابوي بشوفتك

الجد بحزن واسى :؟تاخرت حيل يا صقر

صقر ركض لابوه وهو يبوس يده : انا اسف يبه والله العظيم اسف ما كان في يدي شي

سند سحب صقر ورماه برا : كل شي انتهى في ذاك اليوم اللي اخذت فيه امي كل شي مات معها وانا بعد مت

صفق الباب والجد يناظره بحزن ووقف صقر وهو ينظف كتفه بقهر : هين يا سند هين

الجد : وش سويت في اخوك يا سند

سند : اخوي دفنته مع امي هذا غريب ومستحيل ندخله بينا مستحيل

سطام جاء : جدي مين ذا وش صار

سند : انت لو تسكت يكون احسن

سطام لف وهو مرتفع ضغطه من سند بس وقفه طيحت جده ركض وهو مرعوب ويناديه والكل يركض يبي يسعفه وبسرعه اخذه ابو مازن وسطام للمستشفى والبقيه في ذهول ..

٠

٠

عند ساره اللي كانت تبكي بخوف والكل يهديها تقدمت لها شريفه وقالت بحده : بس ياساره بس احنا مو ناقصين

عنود ناظرت شريفه : مين ذا ؟ وكيف يدخل كذا

شريفه : مو شغلك هاذي مسؤليات اكبر منك

جميله اللي كانت بعالم ثاني ماهي مستوعبه اللي صار ولا هي مستوعبه مين شافت

ناديه : يمه انتي بخير ؟

جميله ناظرتها بهدوء : بخير بخير

وقفت عنود واطلعت وهي تحاول تفهم شي من كلامهم برا جلست وهي تفكر

٠

٠

وعند سطام اللي كان جالس مع الجد وهو خايف عليه وباله مع ذا الشخص لف لابو مازن بضيق : عمي مين ذا

ابو مازن اللي كان يتهرب قد ما يقدر : مب وقته يا سطام

سطام هز راسه بهدوء : بيجي وقت كل شي .

ابو مازن صد بضيق وهو يراقب الدكاتره وهم يعالجون ابوه وكان غضب سطام واضح و واضح انه ما راح يمر مرور الكرام ..

٠

٠

اما عند صقر اللي شاف اللي صار ولحقهم لما اخذوا ابوه ووقف برا وهو خايف انه فعلا يذبح ابوه استند على الجدار بحزن يهد الجبال غمض وهو وهو يقول : حسبي الله عليك يا سند حسبي الله على اللي سويته فينا

انتظر لما طلع الدكتور وراح له : دكتور

لف الدكتور يناظره بشك من شكله : نعم

صقر: ماعليش بس انت كنت موجود عند ابوي وابي اعرف كيف صحته ان شاء الله ماهو شي خطير

الدكتور: لا مجرد ارتفاع السكر وضبطناه له ولكن مازال يحتاج انه يرتاح

صقر اخذ نفس : يعطيك العافيه

طلع متجه لسيارته وفيه ضيق الدنيا ..

٠

٠

عند سند اللي كان جالس بغضب وهو ماسك راسه لف لما سمع شريفه تقول : مو قلت انه ماعاد بيجي لهالبيت

سند : شعرفني انه بيجي سنين وهو مختفي سنين حتى تركنا له الخبر وجينا كيف وصل هنا مدري

شريفه: وشلون بتفسر اللي صار لناس

سند : مو لازم يفهمون

شريفه : تدري ان سطام ما بيسكت

سند : اخر انسان اهتم له هو سطام

شريفه : نشوف يا سند كيف بتسكر الموضوع

تنهد سند وهو مصر انه ينهي وجود صقر من حياة العايله قبل تطور الامور ..

٠

٠

اما عند دانه اللي كان تحس بألم ينهش في عظامها مو قادره تفهم حتى اللي صاير انسدحت بألم وهي تسمعهم يتباشرون بقومة الجد بالسلامه ارتاحت انه بخير وهي ما تدري وش ذا الحظ اللي رماها عند ذي العايله اللي مشاكلهم ما تخلص

وبعد ساعات ودانه تنازع ألمها حست بهدوء في البيت وسمعت صوت سطام يقول : جدي بيرتاح لو سمحتوا مانبي صوت

سند : احد قالك انه لك لحالك

هز سطام راسه بإنزعاج : انا مدري وين احصل رد لك

طلع وتركهم وابتدوء الكل يفترقون

٠

٠

#يـــــتـــــــبــــــــــع...

 

في الحلقة القادمة