وعند الشباب كان مصعب جالس وهو محتضن سند
الصغير ويلعب معاه هو ومازن ونايف
والجد جالس يقرأ قرانه
وابو مازن جالس بضيق وهو يفكر
وسند اللي جالس على الاخبار وضيقة الصدر
والحريم في طرف يسولفون
ودخل صقر وبعد ما ناظر الكل قال : وينه
سطام
رفع عينه مازن بهدوء : الاوادم يسلمون قبل
صقر: انا سألت
سكر الجد مصحفه : وش تبي فيه يا صقر
صقر: ما اشوفه
نايف : وانت وش يعنيك يمكن نايم يمكن بالحمام
احد حطك حارس
صقر : اطلع من جوي انت وياه مالي خلق هواش
الجد: سطام جوا عند البنات
صقر: ماشاء الله ولا كأن فيه حريم غرب
مصعب بهدوء : اوه استوعبت هالنقطه
لف صقر : خييير
سكتوا كلهم وكل واحد رجع يسوي شغلته ومحد
له خلق مرض صقر اللي صار يسبب ازمه
٠
٠
وعند سطام اللي بعد ما حس انه ارتاح شوي
وشال بعض همومه وقف وهو يقول : يلا قوموا
البنات: وين
سطام : تبون فعاليات ؟
البنات: ايوه
سطام : خمس دقايق بنتظر في السياره اللي
ما بتجي بروح واتركها
وبسرعه الكل اختفى ما عدا عنود وساره اللي
وقفت ببتسامه : يلا
سطام: ساره يلا غسلي وتعالي
ساره: يلا
سحب سطام العنود وبعد ما راحت ساره تكتف
: وش فيك
العنود : ولا شي
سطام : اطلعي من ذا الابواب ما تمشي علي
العنود : بس متضايقه عشان ساره
سطام سكت بهدوء : اتمنى يالعنود
ارتبكت العنود وهي تبتسم : وش فيني يعني
عاشقه وانا مدري
ضحك سطام بخفه وهو يضربها على راسها : تسوين
اي شي عشان يوصل الموضوع للعشق
ضحكت عنود وهي تبي تشتت سطام عنها ورفعت
يدها : شوف بنتسابق لسياره اذا سبقتك تحقق لي طلب واذا سبقتني اسوي لك فطور
سطام: من قالك ابي فطور وبعدين وش ذا الغش
من البدايه
العنود : خلاص تحقق لي شي
سطام رفع ثوبه وهو يربطه على بطنه ورفعت
عنود شعرها وهي تنادي للجوري تجيب عبايتها
وبدا سطام يعد : واااااااحد ، اثنيييييين
، ث لااااا ثه
وابتدا الركض والضحك اللي من دون سبب
وسبقت العنود سطام وطبعا تعمد من سطام
وسط صراخ البنات اللي لحقوا على العد وجو
يركضون وراهم
العنود : ايوه ايوه يلا يلا يلا بدون نقاش
تجيب ٥٠٠ ريال وانت ساكت وبالاضافه الى فطور واحلى تمشيه بكره
سطام : قولي والله
العنود وهي تصرخ في اذنه : والله
ضربها سطام وهو يسكر اذنه: وجع بعدين مافيه
٥٠٠ انا ما ازرع الفلوس
عنود : والله لتجيبها والله
سطام : طيري
نطت عنود عليه وهي تدخل يدها بجيبه والبنات
يصرخون وهي تسحب الفلوس وركضت اول ما اخذتها وهي مستانسه وسطام يركض وراها وقف بتعب
وهو يقول : والله لروح واترك
العنود : درب السلامه
رجع سطام بضحك للبنات وهو يقول : بسرعه
بسرعه اركبوا
ركبوا كل البنات بضحك وتحرك سطام ولما شافت
عنود الوضع صدق ركضت وراه بصراخ: خلااااااص وقف هذا فلوسك
سطام وهو مطلع راسه من الشباك : نجوم السماء
اقرب لك
العنود: امانه سطام خلاص امزح
وقف سطام وهو يضحك وجات عنود وركبت بضحك
وهي تنقي من الفلوس وبعدها رجعت لسطام الباقي :معوض خييييييير
سطام ابتسم ولف وهو يقول : اسماء معنا
ناديه: لا رفضت
سطام : الله يعينها ويعينا
وبعد سوالف للبنات قال سطام : هديل فيه!؟
هديل : ايوه
سطام : وش عندك مالك حس
هديل وهي تقول كلمة البنات المعتاده اذا
سألهم سطام ليش ساكيتن: ذبحني حبك
ضحك سطام وقال: وجوري فيه
جوري : ايه فيه
سطام : بعد ساكته
جوري : ههههه بعد ذبحني حبك
ضحك سطام وقال : دانه فيه ؟ هيفاء: ايه
هذا هي
سطام : غريبه وش صاير فالدنيا مالك صوت
ضحكت دانه مع سياق الحديث وبدون ما تحس
: ذبحني حبك
عم الهدوء وتورطت دانه واسرعت هيفاء تضحك
: هههههه حتى انتي اعديناك
دانه: هههههه اي الله يقطع ابليس
والكل صار يضحك ترقيع للموقف
وقالت ساره: وين اخذنا
سطام : اصبروا
وبعد خمس دقايق وقفوا جنب وادي والبنات
طايره عيونهم العنووود :خير ما لقيت الا ذا
ضحك سطام وهو يرفع ثوبه بنفس الطريقه :
اللي بتفلها تجي وترا مافيه احد تقدرون تكشوفون
هديل : والله ياخي انت مافي مثلك
سطام : ما جبتي شي جديد
نزلوا كلهم الا دانه اللي جالسه مع ساره
ويشاركونهم بالضحك واللعب
وقف سطام بعد ما صار كله مويه : خلاص فكوني
ذبحتوني
ساره : خلاص والله الجو بارد بتتعب
ابتسم سطام : بروح امشي شوي عشان انشف
( وكان مقصده ان دانه تلعب مع البنات وتستانس )
واول ما راح سحبو البنات دانه معاهم وابتدو
يلعبون ويضحكون وساره بعد نزلوها وكانت فرحتهم بعد الهموم شي معبر
وبعد نص ساعه رجع سطام ورجعوا كلهم المزرعه
والسيء ان سند كان واقف ينتظرهم
العنود : يوه كنا مبسوطين
سطام: يا ليل ذا الغثاء
ناديه : جوري تخبي
جوري نزلت تحت وهي فعلاً خايفه ووقف سطام
لما شافه يخبط القزاز : هلا
سند : تهلهلت ضروسك وينك طاس بالبنات هالحزه
سطام : انا مع البنات وش بيصير لهم يعني
سند : لا والله انت حتى قطو ما تنفعه
سطام : وش المطلوب الحين
سند : ان شاء الله جوري معكم
سطام : لا تخاف عارفه جوري وش البلا اللي
بيصير لها واختصرت على نفسها
سند : انااااا بلااااء
سطام بإستهزاء: حشاك اقصد السهر
مر سطام سريع واتجه لمدخل المطبخ ونزلت
جوري ركض تبدل ملابسها
اما سطام اللي كالعاده يتعابط مع العنود
وبعدها اتجه لشباب
مصعب : الحمدلله نور سطام
سطام وهو يجفف شعره : ليه
مازن: وين رحت ياخي وتركتنا هنا ضايقه صدورنا
سطام : قبل اجاوبك بركض اعطي جدي ابرته
وارجع
اتجه لغرفة جده مسرع ودخل وهو يشوف ابو
مازن عنده : عساني ما تاخرت
ابو مازن : توني كنت بعطيه ابرته
اخذها سطام وهو يبوس كتفه: انت لا تتعب
نفسك
جلس وهو يعطي الجد الابره وادويته وقال
الجد : وينك فيه
سطام: اخذت البنات يغيرون جو مساكين ضايقه
صدورهم بعد سالفة ساره
الجد : وساره معكم
سطام: ايه لا تخاف ما خليتها
ابو مازن: زين تسوي بس عاد افتك من شر سند
وصقر
وقف سطام وهو يلحف جده : من عيوني
طلع وسكر الباب ورجع وشاف نايف مرمي ونايم
وشكله نايم من قلب وقف سطام يناظره بنذاله
وضحك مازن : تفكر باللي افكر فيه
سطام : بالضبط
قربوا وهو يشيلونه بشويش ومصعب طايره عيونه
اتجهوا للحمام وهم ينزلونه بشويش بالبانيو وكل واحد يكب عليه شي من جهه بس بهدوء ونايف
ولا هو حول احد وفجاءه فتحوا المويه وهم يصرخون
وفز نايف وهو يصرخ معهم ويتزلق بالشامبو
والصابون وكل شي مكبوب عليه وسطام ومازن ومصعب المصدوم ميتين ضحك عليه وبعد عناء استوعب
نايف انه مقلب وتجمعوا على صراخه
سند : وش ذا المصخره
ابو مازن: نايف بسم الله عليك مو كنت نايم
نايف بعصبيه : كله من الحمير ذولا
مصعب وسطام ومازن: هههههه
ابو مازن وهو يحط اللحاف على نايف : حسبي
الله على ابليس
نايف ما صدق يطلع وركض وراهم بس طاح للمره
المليون وكان يقوم ويطيح وهالمره مو بس اللي ضحك سطام ومازن الكل ضحك حتى نايف بنفسه
اللي كان طايح ويضحك: حسبي لله عليكم
جميله : يمممه نايف بسم لله عليك وش فيك
ركضت وهي ترفعه وتضحك على شكله اللي واضح
انه متمقلب
العنود بضحك : هههههه وش ذا يا نايف مالك
هيبه من قبل وزادها ذا المقلب
هديل : هههههه ما تترقع
نايف : اقول توكلي انت وياها
مازن :ههههه لا لا فاتكم احسن قسم فاتكم
هذا ولا شي
نايف : مازن كل تبن
مازن : احلى تبن بأكله في حياتي
اما سطام اللي كان في غيبوبه تامه من الضحك
وهو ماكان كله ضحك على نايف بس كان يدور اي شي يغير موده ويضحكه
وقف نايف وهو متكتف : خلصت ضحك والا باقي
سطام وهو يمسح دموعه اللي كانت على وشك
تحول من ضحك لبكى : شكرا جزيلا من اعماقي ضحكتني وانا من زمان عن الضحك
مصعب : والله اني مصدوم
نايف: على بالك طالع منها بتجيبك الايام
جميله: يمه تعالي حبيبي بدل لا تبرد
سطام: روح يا حبيبي حبيب امه لا تبرد
نايف كان يمشي وهو يرقص بحواجبه لكن طاح
مره ثانيه ورجعوا يضحون عليه
وبعد هالاحداث الحلوه كل واحد اخذ فراشه
وراح ينام الا مصعب اللي كان يدور في تفكيره موضوعه صح مستانس والحمدلله بس ابوه مضيق
عليه حتى انفاسه ابتسم لما سمع الجوري تقول : مصعب عطني سند بخليه ينام معي
وقف وهو يعطيها سند وابتسم : عقبال ما اشوف
عيالك
ابتسمت جوري بخجل وراحت ورجع مصعب يدور
بتفكيره
وماكانت خيبته في الامل اقل من خيبت العنود
اللي كانت تسمع سوالف البنات في الظلام ولا هي قادره تركز من حزنها وضيقها وصوت اسماء
اللي يرن مثل صوت فاااارس ..
٠
٠
ومن بكره الصباح كانوا الكل مجتمعين ويفطرون الرجال برا والحريم
داخل سمعوا دق على الباب قوي ووقف سطام متجه للباب واول ما فتحه وقف ابو فارس بغضب:وين
هوا سطام
سطاام : خير اللهم اجعله خير وش تبي تصارخ
من صبح االله
ابو فارس : هو انت اجل!؟
سطام : ليه ما مليت عينك
ابو فارس : لااا وش بتسوي يعني
الجد : سطااام من ذا وش يبي
ابو فارس : انا ابو فارس وابي بنتي
سطام اول ما سمع كلامه كأنه شايف الشيطان
الرجيم : ماشاء الله اخيرا عرفت بنتك
ابو فارس : لا يكون بتحاسبني انت
سطام : احاسبك واحاسب اللي اكبر من اذا
ما عجبك
ابو مازن تدخل : يا ناس اذكروا الله وش
صاير لكم سطاااام اجلس
سطام : اا .....
ابو مازن قاطعه : سطاااام قلنا خلاص
اخذ ابو فارس وجلسه : وش فيك يا رجال اللي
مثلك فاقد ولده وجاي يتكلم كذا
سطام : خله لين يعرف ان ولده مااات مر شهرين
وهو غاطس بالعسل
ابو فارس : اقول جيبوا بنتي والا والله
والله اشتكي عليكم
سطاااام : نعم نعم تشتكي وش بتقول بتقول
رميت بنتي ولا ادري وين هي فيه حيه ميته صار لها شي ولا ما همك الا ركضك ورا ميراث
فارس
ابو فارس وهو يوجه كلامه للجد : بتعطوني
بنتي والا كيف
سطااام : ابعد عليك من نجوم السماء
ابو فارس : بتاخذ بنتي مني غصب
سطاام : يا رجال شبعنا من ذا الكذب والتزييف
اسماء امانه فارس ما تاخذها لو على جثتي
ابو فارس قبل يتكلم قاطعه صقر اللي كان
واقف : لا تذبحه ولا يذبحك اذا ما تبي بنتك تجلس عند غرب بريحك وحلك عندي
الكل صار يناظر صقر اللي تقدم وحط عينه
بعين ابو فارس : تزوجني بنتك وينتهي الموضوع
سطام لا شعوريا: نععععععععم !
صقر لف له بهدوء : اللي سمعت
ابو فارس : ومن قالك بزوج بنتي
صقر بحده : بتزوجها برضاك بعد والا تحلم
بها لو مو بس تجيب الشرطه لو تجيب الحكومه كلها ما اخذتها وخلك عاقل وبعطيك مهر بنتك
اللي تطلبه وعليه ٥ اضعاف
سطام : مب على كيفك تساوم
ابو مازن مسك يد سطام : اصبر اصبر
ابو فارس ناظر بصقر بهدوء وقرب صقر وهو
يهمس : كلنا ندري انك تبي الفكه منها وزوجتك ما تبيها بس خايف من العار فا اريح لك
عب جيبك و ارم عيبك
رجع صقر لوراء: نجيب الشيخ ويعقد القران
واعطيك المهر وفلوسك وتتعشى وتوكل
كان مساومه فعليه قدام الكل ولكن سطام ما
رضى : لو تموت انت وهو
ابو مازن سحب سطام واخذه وهو يهديه : سطام
اترك الجنان والعصبيه وفكر زين ما كفتك مصيبة دانه بتزيدها بأسماء لو رفضت بيروح يبلغ
وبيجون ويحصلون دانه وانت بالقوه اخذت اوراقك بيسحبونها وتنسجن وتفتح عليك باب مصايب
سطام بقهر: اتركها للمريض صقر
ابو مازن: صقر ماهو سيء لذا الدرجه هو بس
متعسر من اللي صار معه بس خله يتزوجها يمكن تهدي حاله وما تدري وين الخير في الموضوع
ويفك هالمسكينه من ابوها وهي تحت نظرك واذا
صقر اذاها بتدري اكيد
سطام : يا عمي لا تضحك علي بكلمتين
ابو مازن : سطاااام اسمعني وطعني مره وحده
بس وانا اوعدك اسماء في وجهي وجاهي
هدا سطام شوي وماكان راضي بس اصر عليه ابو
مازن لما اقنعه ورجع وشاف ان صقر اقنع ابو فارس واتفقوا وكل شي وطلع سطام بغضب وهو
يسب ويلعن
٠
٠
اما اسماء اللي كل المصايب تجمعت على راسها
موت فارس وجيت ابوها وزواجها من صقر اللي الكل يكرهه والاهانه اللي انهانتها كانو البنات
حولها ويحاولون يهونون عليها
العنود كانت خايفه تعيش نفس موقف اسماء
وكانت هاديه وساره اللي كانت حاضنتها : اسماء لا تخافين صقر مو سيء واحنا معك لا تخافين
وسطام موجود مستحيل يخلي شي يأذيك بس هم سوو كذا عشان ما تروحين عند ابوك ويأذيك
كلنا هنا اهلك وبنحافظ عليك ابوي وجدي وانا
وسطام والكل مسحيل يرضون عليك شي
ناديه : حبيبتي اسماء لا تخافين كلنا معك
الكل كان يحاول يغير جو اسماء بس ما احد
قادر
.
.
والمساء رتب صقر لكل شي وكانه كان عارف
من قبل وكان عادي وضعه جاب الشيخ وملكوا وكل شي وسطام مو موجود ولا راضي يجي لانه لو
جاء بيدفن صقر وابو فارس سوا
والكل كان مب راضي بس يبون الفكه من ذا
الصقر
وبعد العشى طلع ابو فارس بعد ما اخذ فلوسه
قرش قرش وجلس صقر بهدوء ولكن قال الجد بزعل : من وين جبت كل هالفلوس
صقر بهدوء : لا تتوقع اني جلست اشحذ يوم
رميتوني
ابو مازن: طيب من وين جبتها
صقر: اشتغلت وانا استاذن تخبرون معرس
اتجه للبيت والكل يناظره بقرف من طريقة
استفزازه لهم وقف وهو يقول : جميله روحي نادي لي زوجتي
نايف : عسى خير امي ما تروح لمكان هذا اللي
نقص تأمر عليها
جميله: ما عليه يا نايف
نايف : والله ما تقومين
صد صقر وهو يقول : مابي اخرب مزاجي عليك
تقدم وهي يدق الباب وينادي وجات له ساره
: صقر وش فيك
صقر: نادي لي اسماء بعباتها
سطام : على وين ان شاء وين اخذها
صقر:وانتي وش لك شغل
سطام : على كيفك
صقر: اي على كيفي زوجتي وابيها وش تبي انت
سطام قرب وهو يدقه على صدره : صقر لا تستفزني
زواجك مساوه فقط واسماء ما تروح معك لمكان
صقر :ههههه ضحكتني الله يهديك مب انت اللي
تحدد وش مصير زواجي وعمرك ما تقدر تمنعي اني اخذ زوجتي
وكمل ضحك ولف على ابوه : انا اقول زوجوه
بعد ما يصير ذا الغيره بعد
ابو مازن : سطام يا ابوي تعال اتركه عنك
صقر لما حس اسماء طولت دخل وسطام اللي كان
الشرار يقدح من عينه بس وش في يده
٠
٠
وعند اسماء اللي كانت منهاره وتبكي : تكفين ساره
مابي اروح
ساره بضيق : يا قلبي يا اسماء انتي بتروحين
مع زوجك
ناديه : اسماء لا تخافين كل شي تمام ان
شاء الله
هديل: اسمعيني اذا صقر اذاك دقي على سطام
سمعوا صوت صقر وابتعدو كلهم ودق الباب صقر
ودخل وزين منه انه دق : خلو لنا الغرفه يا بنات
طلعوا كلهم وسكروا الباب وكلهم زعلانين
وقفل الباب صقر وهو يناظر في اسماء بتمعن
وهدوء وقرب وهو يمسكها من كتفها لين وقفت قدامه وهي ترجف وتبكي وبقوه مسح دموعها :
اول شي مبروك ثاني شي ليش هالبكى اللي يشوفك يقول بعزا وثالث واهم شي هالحركات ما تمشي
عندي البسي العبايه والحقيني من دون كلام واذا سويتي اي شي عكسي ما بيصير طيب
طلع وتركها وهي بصدمتها كان عندها امل انه
يطلع غير بس تاكدت انها طاحت ولا احد سمى عليها وقفت دموعها من الخوف سحبت العبايه
وهي تناظر شكلها المبهذل ولكن تركته مبهذل يمكن يعافها صقر
لبست وطلعت وهي مو قادره حتى تبدي ردة فعل
رفعت عينها وهي تشوف سطام اللي متكتف بقهر واضح ويناظرها بحزن
قربت من ساره وهي تقول : قولي لسطام اني
بكون مرتاحه لا يشيل هم
ساره هزت راسها ب( طيب) وهي تمسح على كتفها
وركبت وهي مو قادره تتنفس بجنب صقر ابد
٠
٠
ساره اتجهت لسطام : سطام لا تضيق
سطام : كيف اسماء
ساره : تسلم عليك وتقول لا تشيل هم هي بتكون
مرتاحه
لف سطام بحزن على ساره : والله لو صار لها
شي ما اسامح نفسي
جت العنود من ورا : انا اقول تعال خذ سجادتك
وانا باخذ سجادتي وبنوحد الدعا على صقر الزفت
سطام : ااااااخ بس اااااخ
العنود : صح ان زواجه غبي بس ما ندري وين
الخيره فيه
مازن من بعيد: يااااهيه سطام هنا
سطام وقف واتجه له : هنا هنا
مازن : اسمع تعال نبي نتمشى شوي وناخذ معانا
فهد وتغير جو
سطام : والله مالي خلق
مصعب وهو يسكر يمسح وجهه : من له خلق يا
سطام بس نبي نغير جو ونتسلى احس لو جلسنا كذا شويتين بنموت بسكته قلبيه موته جماعيه
نايف وهو يصفق وبيده تفاحه : رتويت ولايك
وشير وسبسكرايب
مازن : يااااشين اللي مطيح على اليوتيوب
اربع وعشرين ساعه
نايف : على شحم
ضحك مصعب: المهم متفقين
سطام : زين اجل ابدل واجي
مازن : اجل انا بدق على فهد
الكل : زين
٠
٠
وعند سطام اللي اتجه لغرفته وهو ضايق ومعصب
بدل وطلع وهو كل ما يتذكر صقر يحس انه بيموت اتجه للمطبخ وهو بيطلع من الباب الخارجي
لكن وقفته دانه : سطام
لف وهو معصب : نعم نعم وش فيه
انصدمت دانه من اسلوبه : ولا شي بس حطينا
لك عشاء ما تبي تتعشى
سطام : مابي اتسمم مابي مااابي
دانه سكتت بصدمه من عصبيته وعذرته بقول ( معصب من
زواج اسماء )
بس هذا عذر احرق قلبها زياده اما سطام ما
عطى الموضوع اهتمام وطلع بغضب اتجه لشباب وهو يقول : اذا بتروحون بسرعه
وفي السياره الكل كان ساكت وهم يراقبون سطام اللي
كان صدره يطلع وينزل بغضب واضح
فهد همس لمازن : وش صاير
مازن : صقر تزوج اخت فارس الله يرحمه
فهد : خير وش سوا وشو سوا تزوج مين
مازن دقه : الله يفضحك يا شيخ
فهد : سطااام وش سوى صقر
مصعب : فهد الله يهديك ماله داعي المبالغه
ضرب سطام الطبلون قدامه بغضب: وش اللي ما
نبالغ فيه على بالك صقر هالكلب بيعيشها زي الناس
مصعب وقف وهو يلف عليهم بهدوء : اسمعوني
زين وبعدين قولوا اللي تبون انا صح صقر عدوي ويتمنى لي الموت مثل ما يدعي لنفسه بالجنه
بس انا اعرفه زين زين حتى لو انه نذل ما راح يأذي بنت ابد وخصوصا اذا كانت في وضع اسماء
ويمكن تكون له خير وهو خير لها وبعدين كذا والا كذا بيسكن عند جدي وبتكون عينك عليهم
يا سطام
فهد بنفسه ( معرفتك فيه يا مصعب كلها غلط
بغلط صقر يبيع الدنيا كلها عشان نفسه ولا يفكر )
مازن: انا اوافق مصعب
نايف وهي مازال ياكل في ذا التفاحه : وانا
بعد
مازن وهو يخبطه بالمنديل : مانبي رايك انت
وذا التفاحه كلها وبعدين قول
نايف : مازنوه لا تحتك
فهد : انا بس ابي ادري شلون سطام وافق
سطام : غصب علي ضغط علي عمي كثير
مصعب : عشان تقتنع ان الكل متفق على هذا
الراي
سطام: ماني مرتاح له ماني مرتاح
مازن: عطه شهر واذا شفت زله صفقت واخذها
منه
فهد وهو يضربه بالمنديل : يا بسطها الدنيا
عندك
مازن ابتسم : هذا من فضل ربي
سطام : بكره بروح اشوف ذا القضيه اللي ما
انتهت
فهد : توني رايح قالوا للحين ما فيه حتى
مشتبه بهم وان اللي متاكدين منه ان اللي قتل فارس قتل الضابط
نايف : بالله عليهم شهرين توهم يكتشفون
ذا المعلومه عارفينها من زمان ومنتهين
سطام: يا ربي انت وحدك عالم يارب ساعدني
مصعب : بتهون يا سطام انت هدي وكل شي بيصير
بخير
٠
٠
اما عند صقر اللي وقف عند شقق فندقيه ولف
يقول : يلااا
نزلوا واسماء تحس انها ثلج من الخوف والرعب
دخلوا وهي تشوفهم كلهم يبتسمون له ويرحبون
فيه ومستغربه ولكن مالها اي نفس حتى تفكر
دخلو الغرفه وصفق صقر الباب بقوه ودخل وجلس
وهو يرمي شماغه بالارض وكان شكله مرعب بثوبه الاسود ودقنه اللي اسود من ثوبه وعيونه
تقدح شرار وقال بهمس غاضب : نزلي عبايتك وتعالي فيه اوامر لازم نفهمك اياها
نزلت اسماء عبايتها بخوف وجلست في اخر الكنبه
وهي ترجف صقر بحده : اقربي
قربت بخوف وهي مو قادره ابد تتنفس صقر
: اول شي لازم تفهمينه زين تشيلين سطام من مخك سوا تعتبرينه اخ ولا اي بطيخ لو تشب
حريقه ما تكلمينه حتى السلام ما تردينه والمكان اللي هو فيه انتي ما تكونين فيه سامعه
وان حسيت بس احساس انك كلمتيه ذبحتك
ثاني شي البنات وحركات والاستفزاز اللي
يصير مابي اشوفه وجلسه معهم كثير مابي وحركات تفضفضين تتكلمين يطلع شي من حياتنا لهم
مابي وان حصل غير هالكلام للمره الثانيه ذبحتك
وثالث شي هالشكل اللي انتي فيه مابيه
24 ساعه ابيك مثل التمثال شعر منكوش وملابس مبهذله مابي وانا ما احب الحرمه اللي ما
تهتم بنفسها ابي اعرف انك جايه من ريحة عطر
ورابع شي كل اللي فالمزرعه ما بينكم اي
احتكاك سلام وعليكم السلام وينتهي ما عدا ابوي وبس
خامسا واخيرا : من اول ما اجي ابيك قدامي
مثل المسطره مابي ارفع عيني ما اشوفك مابي انادي اكثر من مره وكل شي يخصني اكل ملابس
والذي منه ابيها جاهزه اطلب مابي اطلب سمعتي
اسماء : ايه
صقر : فهمتي
اسماء : ايه
صقر وقف وهو يصفق : حلو انتهينا من الكلام
والحين صار وقت الفعل
اتجه لشطنه صغيره في اخر الغرفه واخذها
وحطها قبال اسماء : هذا الحمام غيري لي ذا الهيئه اللي تسد النفس بغيب نص ساعه وارجع
ومثل ما قلت لك مثل التمثال ابيك ولا غلطه
وقرب وهو يهمس في اذنها : وان جيت ما شفتك
بغير ذا الحال بتتمنين ان الارض تنشق وتبلعك وحطي في بالك مهما بهذلتي بنفسك هذا ما
بيغير كونك زوجه وعليك حقوق وافهميها زين
طلع وتركها انهارت اسماء تبكي تقريبا
١٠ دقايق ولما انتبهت للوقت ووقفت بخوف وهي تفتح الشنطه والصدمه كانت مافيها شي ساتر
كل شي كان فاضح اكثر من الثاني
بكت بقهر وهي ما تدري وش تسوي وكانت حرفيا
تمثل مقوله ( وش حدك على المر الا اللي امر منه )
سحبت استر وحده بالموضوع وهي تدخل اخذت
شور ولبست وهي ماهي متقبله نفسها بس مافي يدها شي وكانت تجمل نفسها وهي تبكي واللي
صدمها ان صقر جايب كل شي وكإنه حافظ ايش ممكن يحتاجون البنات ربطت الروب ببكي وهي جلست
وهي تنتظر موتها ووحشها يجي
٠
٠
وعند البنات كانو جالسين ويسمعون لسوالف الكبار عن
اول وعن قصص اول وكيف كانت وكيف تزوجوا
وبوسط الكلام لفت العنود على دانه : وش
فيك
دانه بهمس: ولا شي
العنود : احسك مو طبيعيه
دانه : راسي شوي موجعني
العنود : قومي معي بنسولف هناك
دانه: وساره
العنود : ساره اذا فتحوا ذا المواضيع تدخل
جو ماهي معنا ابد
وقفوا وراحوا يتمشون لما وصلوا قريب الاسطبل
وجلسوا
العنود : دانه انتي ما تذكرتي اهلك
دانه بخوف : لا
العنود : ياخي تذكريني بأحد اعرفه بس والله
ناسيه احس وجهك مألوف
دانه :ههه من وين يعني بتعرفيني
العنود : مدري كذا احس اذا ركزت فيك احس
اعرفك
دانه وهي تمسح وجهها : مدري
العنود: يالله قد ايش مقهوره على سطام احس
بيموت من القهر
دانه بإهتمام : هو ليش معصب
العنود : والله صقر محد يأمن والله كنا
مرتاحين قبله هو والزفت مصعب
دانه : ليش تكرهين مصعب احسه اهون من صقر
وانسان هادي وحقاني
العنود : ايه عشانك ما تعرفينه زي ما اعرف
هذا انجس الخلق كلهم بس جاي يتمسكن عشان يكسب ود العايله وبعدها شوفي
دانه: والله احسه مسكين
العنود : لا عاد تحسين تكفين
دانه : طيب خلاص اسمعي طلعينا من ذا الجو
واحكي لي عن مواقف صارت لكم
العنود : مثل وش
دانه : يعني موقف ما تنسينه صار
العنود طرا لها موقف كانت ما تنساه ومن
بعد موت فارس مستحيل تنساه عدلت جلستها وهي تقول : بقولك موقف يعني كان مثل البطوله
او المعنى الحقيقي لصداقه ولا انتي سميه اللي تسمينه
دانه : قولي لي اسمع
العنود : في يوم جينا عند جدي وكان سطام
وفهد متمشكلين مع احد عيال المزارع اللي جنبنا وكانو هالكلاب يأذون فاارس بحكم انه
اعمى ولا يشوف
وفارس كان ساكت ولا قال لاحد مايبي سطام
يدخل بمشاكل وهو لا هويه ولا شي
وفي ذاك اليوم مر سطام وشاف هوشه قايمه
ولكن كان فيها فارس اللي يخبط بعصاه بدون ما يدري وين يخبط وفهد اللي كانوا متجمعين
عليه ويضربونه بشكل يوجع وحزتها فقد سطام اعصابه وكان زعله على فارس اكثر ودخل الهوشه
لحاله والشباب كانوا كثير 8 اتوقع ضده المهم مدري وشلون دخل بس انه كان يضاربهم وهو
بيده عصا بسيطه ساند فهد على كتفه الايسر وفهد
المضروب لين صار ما عاد يشوف ويضرب بيده اليمين وفارس ورا ظهره صحيح انهم غلبوا
سطام لكن كان يحاول ورغم انه انطعن وانضرب ضربات قويه بس كان يحاول يدافع عن اصحابه
وبعدها طبعا الكل عرف وطلعوا ودخل مازن ونايف الهوشه وكان فارس يحاول انه يبعد سطام
عن مكان الهوشه عشان ما ينمسك وتتعثر اوراقه او ينسجن ما قدرت انسى موقف فارس اللي
رغم انه ما يشوف كان يتحسس سطام لما حصل جرحه ولفه ووقف نزفه
كان يحاول يساعد سطام بيد ويد ثانيه كان
يتحسس بها طريقه ويقوم ويطيح لما وصل للاسطبل ودخل سطام هناك وهو ينادي على عمتي جميله
تنتبه له لين تروح الشرطه ورجع لمكان الحادث وهو بنفس حالته وقلب القضيه ضدهم وانسجنوا
صح موقف مرعب بوقته بس كان مرعبني اكثر موقفهم مع بعض رغم انه هذا مطعون وهذا اعمى
وهذاك ما بين الحياة والموت بس كانوا يدافعون عن بعض في............. وانقطع كلام عنود
لما انهارت وبكت بحرقه
ضاقت دانه وهي تحضنها : ادري فارس ما كان
هين عندكم لكن الله يرحمه
رفعت راسها عنود بعد بكى وهي تمسح دموعها
: ما انسى ذيك الايام اللي كان فيها فهد مكسر وملامحه ما تنشاف وطول وقته فالمستشفى
وسطام طايح هنا بالدوانيه في حال سيء بعد والتهابات جروحه والاضرار اللي جات بعد الهوشه
وكان فارس يروح ويجي بينهم واحيان كثير كان يبات هنا مع سطام مع انه عارف لو صار شي
لسطام هو بالذات ما يقدر ينفعه بس مع ذلك كان ينام واحيان يجلس سهران وكل ساعه يتحسس
سطام اذا فيه شي وكان متجاهل كلام سند اللي يسم البدن وواقف ضده عشان سطام
كثير ايام سيئه مرت على سطام لولا الله
ثم فارس كان سطام انتهى الله يرحمك يا فارس
دانه: الله يرحمه ويغفر له
العنود ابتسمت بحزن وهي تقول : والله حتى
صحبتهم كانت مضرب للامثال اتذكر فيه مره فارس طاح وانكسرت رجله ويوم درا سطام حاس الدنيا
وكان فارس رافض يجي مع سطام هنا وكل صباح يجي سطام وهو شايل فارس على كتوفه من باب
انه يساعده ومن باب انه يفرحه ويبسطه كان لهم حس كانت اصوات ضحكهم تعبي المكان حتى
سند اللي كان يكرههم ما ينكر ان صحبتهم كانت له قصك جميله الوحيد اللي فعلا ادعي ربي
يجبر قلبه هو سطام اكثر من اهله والله
دانه : واضح من انهيار سطام ايام موته
العنود : لا تحسبين انه نساه صدقيني ما
نساه ويبكي عليه كل ساعه بس مجبور يوقف من جديد
دانه: الله يقويه ..
٠
٠
وفي طرف ثاني دخل صقر بكل جبروت للغرفه
وهو يناظر اسماء وقرب وهو يشم العطر بأنفاس
تفجع : ايوه كذا حلو و فهمك للكلام يسهل علي امور كثيره وبنتفق ونصير ناس كويسه ما
نتعامل بالعنف
كانت اسماء مثل الريشه من كثر ماهي مرعوبه
تحس انها بتدوخ ولكن ما عطاها صقر ابد اي فرصه وهو يسحبها له متجاهل دموعها وضعفها
وقلة حيلتها........................ )
٠
٠
وعند الشباب كانوا جالسين بقهوه ولف مازن
على مصعب : مصعب وش وضعك مع عمي
مصعب : والله مدري كنت مفكر ارجع امريكا
وارتاح بس ما دام جولي راحت مقدر اخاطر بولدي
نايف : يا رجال وشو له تروح اجلس بس وبعدين
انا احتاجك كثير
الكل لف على نايف وكمل نايف : يعني من دون
زعل مشغل عنا سند وصقر مع بعض
مازن بطرف عين : يااخي انت اعجز صراحه في
فهمك
فهد : الناس في وادي وانت في وادي
نايف : يااخي من حقي تعبت والله تعبت قبل
كان سند لحاله وكنا هه هه نسلك له وتمشي اموره يعني لكن الحين صقر خلاص احس الاكشن
صار عندي منه فوبيا ابي اعيش بسلام
مصعب : هههههه حسبي الله يا نايف وتضحي
بي انا
نايف: ياخي انت لك 10 سنين مرتاح خذ شوي
من العذاب
مازن: في هاذي صدقت
فهد : سطام خلاص فكها يا ولد
سطام اللي ما زال ضايق : اطلبوا لي شاهي
نايف : خلاااااص يا بطل خلااص لو اقطع لك
عرق بيصب منك شاهي مب دم اركد على نفسك
مازن: سطام المسأله ماهي تعذيب ربي كاتب
نصيبهم لبعض رضينا والا ما رضينا
فهد: روق تكفى
ما قدر سطام يتحمل اكثر ووقف وهو يقول
: انا بطلع امشي لحالي انتم ارجعوا من دوني
فهد : وين بتروح لحالك
مازن: بننتظرك
سطام : لا روحوا انا بخير بتمشى لحالي
راح وما ترك لهم فرصه رجع فهد لوراء وهو
يقول : يالله
مصعب : سطام اذا جلس كذا بينجن
مازن:وش نسوي يعني الله يساعده
اما سطام اتجه لمكان من زمان ما راح له
من زمان حس ان هذا وقته وهو محتاجه دخل المقبره وهو معاه كشاف اتجه للقبر وهو ضايقه
فيه الوسيعه وقف بجنب قبر امه وابوه وهو ضايق جلس بإنهيار وهو يشد على تراب القبر
: اااااخ يا ربي اااااه يا ليت ما رحتوا عني
كلكم الاثنين يا ليت واحد بقى منكم على الاقل احتمي فيه على الاقل ارجع وانا ادري بحصل
لي كتف استند له
والله يا يمه تعبت والله ما قدرت اتحمل
اكثر يبه ما قدرت يا ليت كان الضغط من شخص واحد والكل صار يضغط علي معاد فيني حيل حتى
فاااارس استكثروه علي واقتلوه ... كان سطام يشكي ويخون شكوته دموعه وتنهيدات صدره المستمره
واستمر على حاله هذا لما غفت عينه بدون ما
يحس وكأن الارض كلها ضاقت به ولا لقى له فرج على في قبر ابوه وامه
٠
٠
اما عند العنود اللي مسحت دموعها بضيق
: يعني لما قلتي مواقف هذا اللي تذكرته
دانه : طيب عنود وش قصة سند مع سطام واهله
عنود تنهدت بضيق : والله يا دانه مدري وش
اقول
دانه : لا تخافين ما بيطلع مني خبر
العنود : متاكده بس مدري كيف اشرح
دانه : ابدي من اي مكان
العنود بعد صمت : زمان مره زمان كان سند
يبي يتزوج وحده من بنات اخو جدتي الله يرحمها وكان سند متعلق فيها مره ويكرر هالشي
على جدي وجدتي كثير وكثييير المهم جدتي ما اعطته وجه وكانت تغلي عمي ماجد الله يرحمه
اللي هو ابو سطاام وكان اكبر عيالها وقررت تزوجه البنت اللي يبيها سند متجاهله سند
وتقول انه مراهق ورفض عمي ماجد كثير بس اصروا عليه وزوجه وطبعا سند حزتها ما بقى شي
ماسوا لدرجه انه حاول يذبح عمي ماجد ولكن الكل مستهين فيه ودخل مستشفى الامراض النفسيه
وتأزمت حالته وطبعا عمي ماجد عاش مع ام سطام وحبها كثير وجابوا سطام ولما صار عمره
5 سنين توفوا بحادث وطلع سند وكانت هاذي ثاني صدمه له ومن بعدها مايطيق سطام ولا يمكن
يحبه وماتت جدتي وهو مو مسامحها ومازال متعلق بذيك الاحداث وكارههم ومعتبر ان دمار
حياته بسبب عمي ماجد وطبعا هالكلام مايدري به سطام ولا احد بس انا سمعت ابوي يقول لامي
السالفه
دانه : لا يا ربي وش ذا اللي صاير وش ذا
سطام لو عرف بيموت
العنود : انتي بس لا تجيبين طاري حتى البنات
مايدرون
دانه سكتت بحيره وخوف وصدمه
٠
٠
من بكره الفجر كان الجد يمشي بين الغرف
ويصحي الناس لصلاة ووصل للمجلس اللي كانوا فيه الشباب وفتحه وهو يقول : ماااازن مااازن
ماازززن
مازن بصوت نايم : همممم
الجد : يلا يلا قم لصلاة يلاا
ولف وهو يقول : نااايف ناااايف نااااااااااااااايف
يلا قم لصلاة يلااا
مصعب مصعب يلا يا عيال قوموا الصلاة
سطااام سطااام يلا يا ابوي قم صل يلا
مصعب تحرك ويناظر فراش سطام اللي كان زي
ماهو
وقف الجد : سطاام وينه
صحوا العيال كلهم بهدوء مازن: اكيد قام
يتوضي
الجد : هو جاء معكم والا لا
مازن وهو يمسح وجهه : لا قال بيمشي شوي
وبيجي
الجد بخوف : وشلون تتركونه وهو بذا الحاله
وشلون
نايف : قال بيجي
الجد: وشلون لو راح لصقر وسوا مشكله
وقفوا كلهم بصدمه وهدوء وجاء ابو ماازن
: وش فيكم
الجد : تعال دق على سطام شف وينه
ابو مازن : وينه فيه شي
مازن : يبه هو قال روحوا بمشي شوي بجي ونمنا
وع اساس يجي
ابو مازن : رح رح جب جوالي
مصعب : انا بدق اصبروا
دق مصعب وهو ينتظر الرد
٠
وعند سطام اللي صحى بضيق واختناق على صوت
جواله تحرك بإنزعاج اعتدل وهو ينظف وجهه من التراب رفع الجوال وهو يرد : هلا
مصعب : سطااام وينك الله يهديك خوفتنا عليك
سطام : لا تخافون انا قريب بجي الحين
مصعب : عجل يلا جدي ينتظرك
سطام : عندي كم شغلها اخلصها واجي وطمن
جدي ما رحت لصقر
مصعب : يلا لا تتاخر
سكر مصعب : جدي يقول عنده شغله يخلصها ويجي
ويقول قول لجدي يتطمن ما رحت لصقر
الجد : الله يهديه ويصلحه ويهدي باله
سند : وش فيكم
ابو مازن: ولا شي بنصلي يلا
وضو واصطفوا وصلو ورجعوا الشباب ينامون
ولكن الجد جلس برا وهو ينتظر سطام
٠
وعند سطام اللي وقف وصلى الفجر وطلع متجه
لشرطه دخل وهو يسأل عن الضابط اللي ماسك قضية فارس ودخل بعد ما قالوا له انه موجود
سطام : سلام عليكم
الضابط وقف : اهلا وعليكم السلام
سطام : اسف اني ازعجتك مع ذا الوقت ولكن
اتوقع طالت هالقضيه بدت تضغط علينا
الضابط : لا تحسب يا سطام ان هالموضوع نسيناه
بس القاتل عرف وشلون يتخبى لدرجه انه خبير ما ترك وراه ولا اي خيط
سطام : انا بنجن من ذا وش يبي من انسان
اعمى لا له ولا عليه وعمره ما اذى احد
الضابط : اعمى !!
سطام : ايه فارس الله يرحمه اعمى
الضابط : اعمى مكتوب في التقرير انه اعمى
الى قبل وفاته بسنه
سطام : نعم وش تقول انت لا كذب هذا مافيه
صحه فارس اعمى لين مات
الضابط : يا سطام هذا هو تقرير الطب الشرعي
صح كان اعمى بس انه رجع بصره قبل سنه
سطام حط يده على راسه :وشلون يرجع وانا
مدري ليش فارس ما قال لي ليش
الضابط : هذا يعني انه فيه سر يخليه يسكت
سطام : يا ربي ساعدني
الضابط : لازم تعرف ليه سكت
سطام : وش دراني انا
الضابط : يعني فتش في بيته اعرف من اخته
سطام : لا لا ما اتوقع اخته تدري لكن بشوف
لكن خل هالشي سر لان اخاف يطلع ويهرب اللي قتل
الضابط : زين
طلع سطام وهو يحس انه بينفجر راسه ركب اقرب
تكسي ورجع لمزرعه فارس وهو يحوس داخل البيت ويدور مر وقت وهو يحاول يحصل شي يشرح له
ليه فارس خبى عليه تعب وهي يلف ومؤمن يناظره بصدمه : سطام اش فيه
سطام : مؤمن شوف اذا حصلت ورقه صندوق شي
مخبى قولي على طول
مؤمن : خلاص
طلع سطام متجه لبيت جده وهو ضايق ويفكر
كثير دخل وهو يشوفهم جالسين ويفطرون اتجه سطام لجده وهو يبوس راسه ويده
ابو مازن: سطام وين تاخرت
سطام : كان عندي شغل
سند : ادفع عمري كله واعرف وش ذا الشغل
اللي ازعجتنا فيه
سطام بغضب مكتوم : والله حالياً ماالي خلق
الجدال والغثاء اللي فيني مكفيني
نايف : نمت والا مواصل
سكت سطام اللي كاان يتذكر نومته بين القبور
وصحى وهو يقول : نمت نمت
لف لجده : اخذت دواك
مازن: انا والله بفتن على جدي لا افطر ولا
مشى ولا اكل دواه من الفجر الله جالس ينتظرك
سطام لف بعتب: يا جدي يا حبيبي لين متى
صحتى اهم
الجد : وش تبيني اسوي مدري وينك فيه
سند: لو تجلس تحتريه بتموت من الانتظار
طنش سطام وهو يقوم يجيب ادوية جده وجلس
وهو يقرب الفطور : يا جدي الله يخليك لي انا بخير وقلت لكم اني بتاخر لا عاد تهمل صحتك
وتوجعني
كان سطام يسايره بالفطور وبعدها اعطاه ادويته
ووقف يمشي معاه وهو واضح عليه انه يفكر
٠
٠
عند البنات دخلت ناديه وهي تنزل الصحن:
اخيراً سطام جاء
العنود : وين كان كل ذا الوقت
ناديه : ما قال شي بس جلس اعطى جدي فطوره
ودواه وطلع يمشي معه لكن واضح اللي باله مشغول ويفكر
ساره وهي تغسل : الله يستر بس احس بينجن
من ذا التفكير
هيفاء : ياخي ما ألومه يفتك من سند ويستلمه
صقر المستفز
سمعوا صوته وهو يتنحنح عند الورد ودخل وهو
يرد السلام اخذ موية الورد ورجع وهو يسقيها
العنود : سطاموه لا يكون متزوج من ورانا
سطام تكلم وهو ماله نفس : كان زين والله
اقل شي اغير جو من الحركات اللي مالها داعي
العنود : اوه كلام كبير
هديل : افا والله افا من مزعل الجميل منهو
منهو
جوري : والله يا شينك وانت زعلان
ساره تركت كل شي ووقفت عنده : اافطرت
الكل لف يناظرها وقالت ناديه : وقتك مره
يا ساره
ضحكت ساره : يا اختي كل سالفتكم عاديه بشوف
افطر والا لا راح نصه ونحف
سطام : افطرت يا سوير لا تشيلين هم
عنود وهي تشد شعره: يااا شينك وانت كذا
خلاص ياخي فكها
سطام نزل يد العنود : عنود تكفين مالي خلق
هنا الكل سكتوا لما شافوه منفس لدرجه انه
مايبي احد يجلس عنده طلعوا كلهم وتركوا سطاام بدوامته
وغمض عيونه لما سمع صوت مصعب : سطااام وين
اختفيت وش ذا الشغل اللي طرا فجأه خوفتنا عليك
سطام : ولا شي شغل
مازن : سطام مالك شغل في صقر خله ذا المريض
سطام : ما علي منه خلاص
نايف : ياخي فكها وروق والله يا جدي متضايق
مرره
مصعب : اذا فيك شي ثاني قول احنا نعين ونعاون
سطام : لا والله تسلمون بس كذا ضيقه
مازن: طيب قوم نام وريح واذا صحيت يحلها
حلال
وقف سطام وهو يشوف اقرب مهرب له تمثيل النوم
٠
٠
وعند اسماء اللي صحت على صوت صقر وهو يقول
: يلااااا اصحي يلاا من بدايتها كسل
فزت برعب وهي تلملم نفسها وشافت الفطور
جاهز وركضت وهي تحاول تخلص قبل يعصب ويحوسها
وبعد ما انتهت جلست وهي تحاول تمسك غصتها
وصقر اللي ما انتظرها ويفطر لف وهو يقول
: عجلي افطري بنروح لابوي
اسماء : طيب
وبعد ما خلص وقف وهو يقول : جيبي الشنط
ويلا
نزل وتركها تسحب فالشنط ولكن استوقفه صرختها
ولف مسرع وشاف الشاهي مكبوب كله بحضنها فز وهو يركض رفعها بسرعه وهو يحاول يبعد الشاهي
صقر : وش فيك انتي وش ذا اللي سويتيه بنفسك
اسماء بدموع : ما دريت والله
انهزم صقر قدام دموعها وابعد نظره بسرعه
: قومي غسلي قومي
اسماء ما كانت قادره توقف من الخوف والالم
رفعها صقر وهو ياخذها للحمام فك المويه عليها وهو اللي يشوفه ما يصدق انه صقر لف وهو
يفتح الشنطه اخذ لها ملابس خفيفه وطلع وهو يساعدها وطار للمستشفى واسماء في صدمه من
هدوءه دخل معها المستشفى وهو حريص بشكل ملفت وبعد ما ضمدو لها الحرق رجعوا للفندق وصقر
اللي كان في حالة تصرف غريبه ساعد اسماء لما دخلت بفراشها وهو يعلي المكيف ويسكر الانوار
: لا تتحركين وارتاحي ما راح نطلع اليوم
طلع وسكر الباب واسماء تحاول تستوعب طيبته
الغريبه
اما صقر اللي للحظه حس انه خاف عليها فالنهايه
مهما قسى يشوف من وجهة نظره انها طريقة لتأديب
٠
٠
وعند دانه اللي كانت ضايقه من ضيق سطااام
وكانت ما تنلام لو حبت سطام ولو شالت له كل هالمشاعر كانت طول اليوم وهي تصرف نفسها
عشان ما تقابله وهو بذا العصبيه وبالقوه قااادره انها تبعد من البنات واحيان تحس انها
تظلم سطام وبين قرار الهروب لدار الرعايه او الابتعاد كلياً عن سطااام
٠
٠
وفي طرف ثاني كان مازن يتمشى بين شجر التفاح ويغني
ويحاول انه يروق من بين ذا الاحداث سمع صوت جوري وهي تكلم مصعب بزعل : خلني اروح معك
مصعب وهو شايل سند الصغير: جوري تكفين مالي
خلق حنة ابوي بروح اوديه وبطمنك عنه لا تخافين
جوري : بيشغلك عن السواقه اخاف يصير لك
شي
مصعب : بخلي نايف يوديني ارتاحي
جوري : اوووف
طلع مصعب وهو يراقب سند اللي كان تعبان
وهو يداريه من البرد والهوا
اما جوري اللي لفت بضيق ودخلت ومازن المبتسم
ويناظرها تحرك بإنزعاج وهو يقول : والله معاد ابي اصبر ابد لا باركت في عمي سند مدري
وشلون يزعل هالوجه مدري
اتجه لابوه وهي في قلبه حماس وفرح شافه
بالديوانيه جالس قريب النار ويتقهوى وعنده الجد
مازن : السلام عليكم
الكل : وعليكم السلام
دخل مازن وجلس بينهم : جيت بطلب واذا رديتوني
بموت موته مؤسفه
الجد : بسم الله الرحمن الرحيم انطق بالخير
يا ولد
ابو مازن: رغم اني ماني مرتاح بالاحداث
اللي تصير بس الحسنه الوحيده انها مريحتني من تحلطمك وقرارات السامجه
مازن : افاا ما هقيتها منك بس تمون ع الرقبه
والرقبه سداده
ابو مازن: انا دااري من يوم قمت تنكت وسالفتك
مثل وجهك
الجد : خلنا نسمع قول
مازن : ابي اتزوج
ابو مازن اعتدل : هااه وشهو
مازن : ايه اخيرا اقتنعت يلا استانس
الجد: وانت شايفنا بحال زواج
مازن : ههههااا اصبروا بقولكم البنت عشان
يكتمل الحال
ابو مازن وهو حاط يده على قلبه: يا ربي
ردني لك ردا جميلا
مازن ابتسم : زوجوني الجوري
سكتوا كلهم للحظه وقال الجد : جوري بنت
سند ما غيرها
مازن: ايه نعم
ابو مازن بهدوء: وش جابها على بالك
مازن: والله هي بنت عمي وانا اولى بها
الجد : الحين وش طرا عليك ذا الامور
مازن: والله نفسيا تعبت احتاج احد يواسيني
على ذا الاكشن
ابو مازن : والله مدري
مازن : تكفون لا تردوني
الجد : اركد مافي يدينا شي اركد نشوف عمك
مازن : بس حاولوا تكفون
الكل سكت خوفا من ردة فعل سند وطلع مازن
ولف الجد على ابو مازن: وش بتسوي
ابو مازن : صراحه يبه جت بوقتها
الجد: وشلون
ابو مازن : سند طلب مني اذا ابيه يرضى على
مصعب ازوجه العنود
الجد: هااه
ابو مازن : وانا قلت لمصعب وانتظر قراره
وبشوف ودام مازن يبي الجوري اتوقع ان الامور بتصلح وبيني وبينك ودي الجوري تطلع من
بيته ياخي سبب لها رعب وكبتها
الجد : يالله انك تهديه وتصلح باله
٠
٠
واخر الليل طلع سطام متجه للمطبخ يبي يدور
اي شي ينأكل دخل وفتح النور وصد أول ما سمع شهقة دانه اللي كانت جالسه وتاكل
سطام : دانه بسم الله وش فيك
دانه ارتبكت اول ماشافته : مافيني شي كنت
اتعشى لكن خلاص انتهيت الحين بطلع
بسرعه جمعت اغراضها وسكت سطام اللي حاس
انها اخذه على خاطرها
قرب وهو يطل بالصحن : وش مسويه
دانه لفت له بإستغراب : هاه
سطام : وش طابخه
دانه ( هذا مريض يصارخ ويعصب والحين يسأل
وش طابخه ) : بيض ؟؟
سطام : تسوين لي مثله!!!؟
دانه ( لا بالله انجن ) : زين خمس دقايق
بس
رجع سطام وهو يقول : بجلس برا
طلع سطام وجلس برا ودانه اللي كانت تراقب
مكانه بصدمه ( ماشاء الله ولا كأنه سوا شي ) ابتدت تحضر وهي معصبه وبعد ما انتهت وجهزته
اتجهت لسطام بغضب وهي تنزل الاكل على الطاوله :بالعافيه
سطام ابتسم بخفه : انا اسف
لفت دانه بهدوء: على ايش
سطام : دانه ماله داعي تسوين نفسك ما تعرفين
ادري زعلانه عشان عصبت عليك لكن بعذري ظروفي ذا الايام متعبه
دانه: لا عادي من قال زعلت
سطام ابتسم : اذا مو زعلانه وش تسوين ذا
الحزه بالمطبخ
سكتت دانه وبعدها قالت: لا عادي
رجع سطام لأكله وهو مو فاضي يزعل احد ويراضيه
اما دانه اللي قررت قرارها النهائي وابتدت
تلملم نفسها وقررت انها تهرب لدار الرعايه وبتنتظر كم يوم وتهرب
٠
٠
ومر اسبوع وسطام يحوس حوس في كل مكان يعني
فارس وللان ما حصل سبب
واما دانه اللي قررت تهرب مع ابو مازن اذا
رجع تتخبى وتهرب
ومازن اللي كان كل يوم يحن على ابوه يبيه
يفاتح ابو سند
ومصعب اللي ابو مازن ينتظر قراره وهو ما
زال متردد في ذا الموضوع
والباقين هادين ومتعايشين مع الوضع
٠
٠
ومن الصباح طلع سطااام متوجه لبيت فارس
دخل وهو يدور بعيونه على مؤمن
لف اول ما سمع صوته : سطام
سطام لف :هلا مؤمن
مؤمن مد لسطام ورقه : انا حصلتها في ظرف
في مطبخ
سطام اخذ الورقه بسرعه وجلس وفتحها ويده
ترجف ( سطام .. يا اخوي وصديقي واهلي كلهم مدري اذا بلحق اقولك او بموت قبل وتقرا الرساله
بس اعرف اني ما خبيت عنك عشاني مو واثق فيك بس كان لي خصوصية في ذا الشي ولكن مدري
اذا عرفت او لا لكن ابشرك اني شفت في يوم تعثرت وطحت ولكن بعدها حسيت اني قادر اشوف
وبعد تقريبا يومين قدرت اشوف كان ودي من الفرحه ابشرك واقولك بس خفت وترددت يمكن ما
معي حق بس اني خفت انك تبعد عني ، ولكن من طرف ثاني وطرف اقوى كان لي غاليه انسانه
حبيتها اكثر من نفسي كانت لي كل شي وخفت بعد انها تبعد عني لكن انا اعتذر منك كثير
مدري اذا فرحت او ضقت وزعلت لاني خبيت عليك بس تأكد انك توأم روحي وما كان هين علي
اخبي وامثل عليك بس شفت اني ابقى على وضعي ارحم واحسن لي ... انا اسف واعتذر لك وادري
بك ابو قلب ابيض وبتسامحني .......اخوك / فارس )
نزل سطام الورقه وهو يحس انه ما زال ما
فهم سبب فارس وصدمته الثانيه بهاللي يحبها فارس يمكن تعرف شي لكن من هي
لف لمؤمن : مؤمن كان يجي هنا بنت لفارس
يعني تسمعه يكلم او شي
مؤمن : لا
سطام : وينه جوال فارس !!
مؤمن : مايدري
سطام : لازم اشوف جواله لازم
ابتدا يدور على جواله وحصله وفتحه وهو يقلب
في في المكالمات والمحادثات وكان اغلب الرسايل لرقم مسجل ( عيوني )
دخل سطام المحادثات وكانت اخرها محادثه
صوتيه لفارس وكان يقول ( الله خذا عيوني وجابك يالعنود تكفين لا توخذ عيوني مرتين
)
دق قلب سطام برعب وانتقلت يده لرساله اللي
فوق وكان اللي خايف منه طلع صدق وسمع تسجيل العنود وهي تقول ( وينك ماترد فيه شي عن
مصعب لازم تدري به )
وقف بصدمه وهو يحس ان العروق في راسه تفجرت
وصرخ وهو يرمي الجوال : ليييييييييييييه ليييه يا فارس لييييه لييييييييه
انفجع مؤمن من صراخ سطام وخاف ولا عرف وش
يسوي غير انه يرجع لورى بخوف
٠
٠
وعند اسماء اللي كان صقر طول هالاسبوع معها
هادي وطيب وقفت بعد ما بدلت الضمادات لحرقها وكان جرحها متشافي اكثر ومتحسن سمعت صوت
صقر يدق الباب: اسمااء وش تسوين
اسماء طلعت بهدوء: كنت اغير الضمادات
صقر: ليش ما انتظريني !
اسماء سكتت وهي تمسح يدها وقال صقر: فيك
حيل طريق
اسماء : مدري
صقر بقلة صبر : انا اتكلم عربي جرحك يتحمل
طريق او لا
اسماء : ان شاء الله
صقر : اقول اجلسي خليني اشوف لو اجلس على
كلامك صرت مدري وان شاء الله
جلست اسماء بخوف وقرب صقر وهو يشوف الحرق
: تحسن بس باقي يبي له وقت
ابتعد اول ما دق جواله برقم ابوه : هلا
يبه
الجد : الحين انت ما تعلمني انت وينك مختفي
ببنت الناس
غمض صقر بغضب : رد السلام اقل شي يبه اسأل
عن احوالنا جاملنا اقل شي مانيب كافر انا
الجد : ما ألومي يا صقر ما ألومي خذيت بنت
الناس واختفيت اسبوع ما ندري بك ولا حتى اتصلت
صقر: يبه انا مانيب وحش كلكم خايفين كذا
ان اختفيت هذا من حقي معرس وابي اقعد مع زوجتي زين وش بلاكم انتم
الجد: بتجينا والا بعد بتجلس
صقر : لا يبه بجلس بعد شوي
الجد : عطني اسماء بكلمها
صقر هز راسه بأستياء وهو يعطي الجوال لاسماء
: ابوي بيكلمك
اسماء اخذت بأرتباك: الو
الجد : هلا والله يا بنتي كيفك وش اخبارك
مستانسه ان شاء لله عسى صقر مب مقصرٍ معك بشي
اسماء بالقوه انطقت : الحمدلله انا بخير
وصقر مب مقصر انت كيفك
الجد : الحمدلله بخير بخير انتي كل يوم
دقي علي وطمنيني عليك
اسماء : ان شاء الله
اخذ صقر الجوال : مشكور على خوفك عليها
يبه بس اسماء في امان وولدك بيحافظ على زوجته فلا تخاف عليها من ولدك
الجد : يا صقر لا تلومني انت اخبر بالحال
صقر: ايه اخبر وادري بسطام جلس عندك لما
حشى راسك علي لكن لنا الله واستاذنك يبه
سكر وضاق وانقلب حاله ولف وهو يقول بعصبيه
لاسماء : الغداء الحين بيوصل تغدي ولا تفتحين لاحد
طلع وتركها بعد ما دخل الغداء وسكر الباب
واسماء تاكدت ان كل حال صقر السيء من اهله بس ما تدري ان وضعه تطور والا عادي ينفع
معه اي طيبه
٠
٠
وعند سطاام اللي بالقوه قدر انه يهدي ويستوعب
الوضع (كيف العنود تكون على علاقه مع فارس كيف انهبل سطام وهو يحاول يستوعب الوضع شد
على شعره وهو ما توقع انه ينحط بهالموقف من اغلى اثنين على قلبه ( عنود وفارس ) كيف
تجرأو كيف لو هو فهد يمكن بس فارس ولو هو غير العنود بسيطه بس العنود تكسر ظهره وقف وهو يشقق الورقه
ورمها واخذ الجوال وقفه وحطه بجيبه واتجه للمزرعه وهو يحس بخيبه امل تهد جبال ..
بس العنود تكسر ظهره وقف وهو يشقق الورقه
ورمها واخذ الجوال وقفه وحطه بجيبه واتجه للمزرعه وهو يحس بخيبه امل تهد جباال دخل
وهو يشوفهم كعادتهم متجمعين اتجهت عينه صوب العنود وهو يحس انه مو قادر يتنفس من القهر
الجد وقف بخوف : سطاام علامك يا ولدي وش
فيه وجهك
اابو مازن : خير يا سطام
مسح جبينه سطام : خير خيير وش فيكم مروعين
مصعب : سطام وجهك ما يبشر بالخير
سطام : قلت لكم مافيني شي خلاص
اتجه للعنود وهو يقول : تعالي ابيك
وقفت عنود بهدوء وهي ما تدري وش فيه سطام
مشت معاه وهي تشوف عروق رقبته واضحه من العصبيه وجه اسود بكل ما تعنيه الكلمه حتى خطاه
تشرح غضبه
الجد :ياربي تستر وش صاير معه
ساره: يا جدي الله يهديك انت ما تعودت على
حال سطام من توفى فارس وهذا وضعه بس يمكن عشان مؤمن بعد بيسافر تلقاه متضايق بس ودام
طلب العنود مافيه شي بيجلسون ويضحكون ويسولفون وانت عارفهم
مازن: اي يا جدي ما تعرفهم يعني
رجعوا جلسوا وهم شبهه متطمنين
٠
٠
عند العنود وسطام اللي كان يمشي لين ابتعد
لاخر نقطه فالمزرعه وقف واول ما لف وشاف العنود بدون ما يحس ومن قهره ضربها كف طلع
من اعمااااق اعماااق قلبه
اتسعت عيون عنود بصدمه وهي حاطه يدها على
خدها بصدمه ما قدرت ترد وهي اللي تدري ان سطام مستحيل يزعلها فكيف يضربها
مكسها سطام من كتفها وهو يهزها بغضب وصراخ
:ليييييييش سويتي كذذذذا لييييش وش سويت لكم تغدروني وش سووويت لكم وانا اللي مستعد
افدي بروحي عشانكم اخر شي هاذي سواتكم كيف قدرتي يا العنووود كيييف قدرتي
عنود اللي كانت تناظر بصدمه وهي تراقبه
وخايفه تسأله ويطلع اللي في بالها صح صحاها من تساؤلاتها كيف سطام الثاني لها وهو يقول
بصعوبه : كيف قدرتي تكونين مع فارس كيييف تخونوني كييييييف
عنود اللي كانت طايحه بصدمه وهي تشوف سطام
اللي كان كل ما يحاول يقوي نفسه ويضربها يلف ويضرب اي شي قداااامه هنا عرفت انها فقدت
سطام وفارس وانتهى امرها قرب سطااام وهو يصرررخ : احكي انطقي تكلمي ذبحتيني قوولي لا
تسكتين قووولي يا عنوووود
عنود اللي كانت مو قادره حتى تبكي
جلس سطام بإنهيار وهو يناظرها : وش اللي
صار يا عنود قولي لي تكفين قوولي
العنود اللي ضاعت منها الحروف بالقوه انطقت
وقالت : والله يا سطام ما سوينا شي يفضحك ويخزيك والله كل اللي بينا شي نقي وطاهر ولله
ضرب سطام الارض بجنبها : كيف لك وجه تسوينها
كييف اشرحي لي من البدايه كيف صار ذا الامر كيييف
العنود اللي كانت تحاول تشرح بس صوتها ينقطع
من الخوف: تتذكر قبل ثلاث سنين ايام الهوشه اللي انطعنت فيها انت وفهد وكان فارس يروح
ويجي عليك احيان كثير كنت مضطره اتكلم معه واقابله ويسألني عنك واسأله عن ادويتك واستمرينا
بذا الحال وقت طويل وكنت اسأله عن ادويتك بس واقفل لين صار الوضع صعب وانت كنت مريض
مره وكنت في وضع حرج ونقلناك للمستشفى وحزتها كان فارس قريب وكل شوي يجي يتطمن علي
ويواسيني بعد ما تشافيت انقطعنا لكن انصدمت ان فارس دق علي وصرح بكل شي في قلبي وقالي
انه ينتظر تتعدل اوضاعك واوضاعه وبنتزوج طبعا طنشت وتركته ولكنرهو ما تركني لين رديت
له بجواب صارم ومدري كيف تطورت بينا بس والله ماكان بينا الا المكالمات واصلا فارس
كان اعمى ما عمره قالي شي يخدشني او يخدش اهلي بالعكس كنت اغلى عليه من عيونه
سطام جلس وهو ماسك راسه : يكفي انك خدشتينا
وخدشتي كرامتنا وش موقفك لما يسحبونك الشرطه بصفة انك حبي..... كيف تبيني انطقها كيف
تبيني اقولها كيف تبين منظر ابوك ومازن واهلك لما يعرفون
العنود : سطام تكفى انا اسفه الله يخليك
سامحني انا خسرت فارس خلاص بس انت تكفى لاااا
سطام دفها وهو يوقف : عنود قوووومي من قدامي
مابي آذييييك قووومي
وقفت العنود وهي تبكي وبعدت هي بعد وانهارت
تبكي
اما سطام ما استوعب ورجع يدور عنود : تعرفين
احد كان مأذي فارس
عنود رفعت راسها : لا ماكان له احد مأذيه
من قبل
سطام : عمرك لاحظتي شي
عنود : لاااا
رجع سطام وهو غضبه ياكل قلبه صعب عليه يسألها
عن فارس صعب
رجع جلس بتعب وهو يقلب بجوال فارس ويقلب
ويقلب ما حصل شي اخر شي رماه وهو يكسره بضيق وغضب لما صار فتااااات
٠
٠
اما مصعب اتجه لعمه ابو مازن وهو يقول
: عمي تعال ابيك
وقف ابو مازن معاه بهدوء : امر يا ولدي
مصعب: ما يأمر عليك عدو ولكن انا جايك اطلب
يد العنود
ابتسم ابو مازن : والله اتشرف فيك
مصعب : بس يا عمي اذا العنود رفضت حلفتك
بالله ما تجبرها
ابو مازن : ابشر يا مصعب بكلمها بشوف والله
يكتب لكم كل خيير
مصعب : الله يسعدك
راح ابو مازن ووقف مصعب بهدوء وهو ما وافق
الا متأكد ان العنود بترفضه وبترفضه بشده بعد وكذا بيكون ارتاح وكسب رضا ابوه وراحة
باله
٠
٠
عند البنات رجعت ناديه وهي تنزل الكوب من
يدها : عنود وسطام تأخروا
هديل : والله ما ارتحت لوجه سطام
هيفاء: توقعون وش فيه
ساره : والله مدري الله يستر بس
دانه : بنات متى بترجعون
ضحكت جوري : مليتي منا !!
دانه ضحكت : لا بس اسأل
هيفاء : اتوقع ذا اليومين
دانه : اها
سمعوا صوت نايف ينادي : يا سووير
ساره : تعال نايف
نايف : زين متجمعين ابرك ساعه
ناديه : وش فيك
نايف : احب اني ابلغكم ان شريفه رضت ورجعت
وهذا هي جايه بالطريق
هديل : الله لا يعطي العدو عافيه من اللي
رضاها بس خلوني اتوطى في بطنه
جوري : انا معجبه في اكشن عايلتنا ما يمدينا
نريح من مصيبه الا تبتدي مصيبه جديده
سمعوا صوت مازن اللي جاي ومعاه القهوه
: ياخي انتي لا تنعجبيين في شي ترا على طططول يتدمر
ضحكوا البنات وجوري اللي اول مره تحسها
محرجه من مازن ومن انها ترد لكن رفعت نفسها وهي تحضن سند الصغير وقالت بكلام مبطن : والله المفروض تكون انت اخبر
واحد بالدمار
الكل ضحك على بالهم تقصد مهاوشاتهم
لكن مازن ابتسم وهو يناظرها بهدوء : هو
الدمار كلنا متفقيين عليه وقاضين بس لكن انا اقول رآفة بالمسلمين ورحمه اختصري اعجابك
( وكان يقصد بكلامه انها تختصر اعجابها عليه لحاله وانها هي فعلا دمرته وجابت راسه
)
وفهمت الجوري وهي تبعد عيونها وضحكت ساره:
ياخي حرام علييك خلها بحالها ذبحتها بالطقطقه والقصف
الجوري اللي كانت تحاول تلاقي رد لمازن
ولكن مازن كان صرريح جداً بإجاباته وكأنه فعلا يقول ( انتي لي ومختصره علي حتى في دمارك
)
لكنها وقفت وهي تقول : والله يا شيخ مازن
انا امري بسيط و واضح لكن وش نسوي فيك يعني ما يحتاج اقولك فعالك
مازن اللي رفع حواجبه وهو يبتسم : والله
مدري بروح اشوف وش ممكن تسوين فيني واحصل لك حل
واقولك
نايف : خلاص خلااااص تكفون نزلوا اسلحتكم
وقفوا القصف مانبي اكثر بس اللي جيت اقوله شريفه بتجي وتجهزوا وبس
ساره: ايه تكفى خذه كذا كفايه
جلست جوري وهي مبتسمه وطلعوا العيال ولكن
انتبهت جوري لرساله وصلتها وفتحتها وكانت من مازن يقول ( الحل فيني انك تحبيني ، واليوم
اللي بتكونين فيه من نصيبي برمي لك اسلحتي
كلها واستسلم )
بردت اطراف جوري وهي مذهوله من كلامه اللي
ما توقعته يطلع من مازن ابتسمت وهي لا شعورياً تحس قلبها بيطيح
٠
٠
اما العنود اللي تماكلت نفسها بصعوبه ورجعت
للبنات وهي تحاول تبتسم
جوري : اخيراً خلصتوا
ابتسمت العنود بحزن:وش اسوي خذانا الوقت
ما حسينا
هديل : كأنك بكيتي !؟ .
العنود وهي تمسح وجهها بضيق : تعرفون ذا
الايام اصعب ايام سطام وكسر خاطري ضايق مره ومكسور عجزت اتحم... وخنقتها عبرتها ونزلت
راسها تبكي بحرقه
انفجعوا البنات ووقفوا كلهم حولها ساره
حضنتها : عنوود بسم للله علييك لا تخوفينا على سطام لذا الدرجه وضعه صعب
ناديه : عنود تكفين لا تبكين انتي الوحيده
اللي تقدرين تسندين سطام لو انهرتي هو بعد ينهار
جوري : عنود وش صاير مع سطام دام حالك كذا
اكيد هو بعد منهار
رفعت راسها عنود : ولاشي بس اني تأثرت مرره
وضقت يعني كنت ماسكه نفسي عند سطام بس انفجرت هنا
ناديه : العنود ادري ما نقدر نسألك وش قال
سطام او وش فيه لانه اكيد لما قالك مايبي احد يعرف بس بس اقولك انك انتي قوة سطام بعد
فارس حاولي تتماسكين
وما تدري ناديه انها اصابت اعماق جروح العنود
اللي وقفت وهي تشهق واتجهت للغرفه وانهارت بكل قوتها
جوري : بننات والله خفت على سطام
هديل: لا تخافون هو اكيد متضايق من فقد
فارس ومقهور من صقر ويمكن يدري بجية شريفه وعمي سند مو مقصر وسطام كتوم واكيد كثير
اشياء في صدره وقالها للعنود وتعرفون البنت مو مثل الرجال بتنهار اكيد
ساره: يا رب تهدي باله يارب حتى ما سألنا
وينه فيه
دانه اللي كانت حزينه من قلبها على سطام
ولكن قررت ما تهتم ذا الفتره وتبعد بهدوء بدون ما يوجع قلبها شي وقلب سطام معها
٠
٠
عند سطام اللي كان ما زال بمكانه وقف بعد
ما حس انه طلع كل اللي بقلبه وقف بعد ما غسل وجهه وهو يتعوذ من ابليس تنهد واتجهه لهم
بعد ما اخذ نفس دخل ورد السلام وجلس
مازن ركض له وهو يقول : حلفت ما تعطيني
بشاره
سطام جلس بهدوء جنب جده : قوول
نايف ركض وهو يدف مازن اللي طاح على مصعب
وقال بسرعه : شريفه رضت وهذا هي جايه بالطريق
رفسه مازن : انقلع يابز
جميله: نايف وجع اسمها عمه شريفه
سطام : الحين هذا اللي تبون عليه بشاره
نايف : والله انا مانيب طامع بالبشاره
مازن : انا والله طامع
سطام : انا اقول ضف وجهك
استند سطام على ذراع جده وهو يتنهد ولف
الجد بضيق: بسم لله عليك يا ابوي وش فيك يا عين جدك
سطام احتضن ذراع جده بقوه وهو يقول : احس
بنوم
مازن: يااشين الدلع اقول قم ترا من اسبوع
ما جلسنا زين وترا كلها كم يوم وبنمشي
سطام : والله مالي حيل
مصعب : انا اقول قم بنتقهوى ونلعب لنا كوره
تنشطك
سطام : لا عاد كذا كثير
ما حس سطام الا هم شالوا واخذوا للحمام
سحب مصعب المويه وهو يفكها على سطام : يلا يلا خذلك دش ينشطك وتعال
استسلم سطام وهو يصفق الباب وطلعوا العيال
وكان مصعب ونايف يرتبون الملعب
.
ومازن اللي اتجهه للبنات وهو يقول : يابنااات
لفوا البنات بضيق وهو يتغطون ودخل مازن
يقول : اسمعوا نبي الفزعه
البنات : وشو
مازن: اول وين عنود
ساره : نايمه
مازن لف لهديل وهيفاء : يا الشمطاوات
هديل شهقت: وجع من الشمطاوات
مازن : انتي وهي
هيفاء : مازنوه احترم نفسك ترا ماني مثل
جوري
مازن تكتف : يا شيخه يازينها الجوري جنبكم
ساره: مااازن ما تشبع محارش
هديل: ملقوف كالعاده
مازن : اقول اص واسمعي بس روحوا صحوا عنود
طيب غصب وانتم اجهزوا وتعالو هناك قسم الرجال بنسوي مباراه عشان نغير جو سطام شوي
ساره: ايه تكفى غيروا جووه
مازن: زين انا بروح اكمل الحريم الكبار
وعمامي
ناديه :بتنظرون شريفه
مازن: ما ظنيت
راح مازن وجمع الحريم كلهم وكلم عمامه على
اساس يدخلون معهم في اللعبه
وفي نص المعلب الكل كان مستعد حتى العنود
وجاء سطام وهو ضايق: ياخي غيروا اللعبه
سكتهم الجد اللي جاء : لا لا بنلعب
ضحكوا الكل على الجد اللي كان رافع ثوبه
مستعد انه يحكم عليهم
وسند اللي جالس ويناظرهم بطرف عين
سطام : كيف بنتقسم الحين
مصعب : انا ونايف وعمي مع بعض وانت ومصعب
مع بعض
صقر اللي دخل مع الباب وسمعهم : وانا مع
مين
لفو كلهم عليه وهم ماكانو يدرون عن جيته
ولف سطام وهو ضرب فخذه : يالله يا ربي رضينا بالهم والهم ما رضى فينا
مازن : سطام روق الامور سهالات
قرب صقر يسلم على ابوه واللي ممكن يسلمون
عليه وراحت اسماء للبنات اللي بسرعه احتضنوها وهم يسلمون عليها
الجد: تاخرت علينا يا صقر
صقر: هذاني جيت يبه الله يخليك لي لا تتعب
نفسك
الجد: اسماء بنتي كيفك
اسماء بهدوء : بخير الحمدلله
سطام قرب : اسماء كيفك ان شاء الله احسن
اسماء توترت وهي تناظر صقر اللي احتدت نظرته
: الحمدلله
مازن حس بنظرات صقر وبسرعه قال : زين زين
اتركوا السلام ونرجع لموضوعنا صقر تلعب !
صقر وهو يناظر سطام : نلعب
مازن : زين يلا بنرجع نقسم انا ومصعب وسطام
مع بعض ابوي وصقر ونايف مع بعض
صقر : كورة قدم!
نايف : لا طايره ماتشوف الحبل
صقر : زين اجل ما يحتاج نبدل
ابتدوا يجتمعون ومصعب وسطام كارهين اللعبه
من صقر وابتداء اللعب طبعا الاغلب كانوا في صف مازن وسطام ومصعب
وقف نايف اللي حس ان فريقه بيخسر والوضع
نار لان سطام كان يضرب الكوره بكل قوته وقهره ومحد قادر يوقف اهدافه ومصعب نفس وضعه
ومازن الوحيد اللي يحاول يوازن الوضع
نايف : لحظه لحظه
الجد : وش فيك
نايف : الحين حنا عيال البطه السوداء
الكل :!!!!
نايف : كلكم تشجعون الفريق الثاني واحنا
محد يشجعنا الا امي وخالتي ام مازن خير نبي فريق
مازن : وش حارك انت العب ما عليك من التشجيع
نايف : ااااخ يا ليتني متزوج كان الحين
زوجتي الحين تشجعني
جميله ماصدقت: عشان تعرف اني اذا قلت لك
شي فهو لمصلحتك
مازن : اهاا بدينا بدينا
نايف : امزح امزح اصلا يكفي انتي يا حلوة
اللبن
مصعب : تموت لين تجيب لنفسك الكلام
سطام اللي كان يسرق النظر للعنود اللي كانت
هاديه ورجعوا يلعبون وفي نص الحماس والصراخ تحمس مصعب وهو يضرب الكوره بكل قوته وطارت
الكوره من الملعب ووقفت عنود باللحظه الغلط وضربتها الكوره على راسها وصرخوا البنات
لما طاحت عنود والكل ركض واولهم سطام اللي نط وهو يرفعها : عنوود عنوود
عنود اللي كانت حايمه كبدها من كثر ما بكت
وتحس خلاص من الصداع ما تشوف وداخت زياده من الضربه سندها سطام وهو يناديها وردت بعد
فتره من الغبي اللي رمى الكوره
مصعب تورط : والله بالغلط طارت
مازن دقه : الحماس اللي على غير سنع
العنود وقفت بغضب وهو ماسكه راسها وقرب
ابو مازن : فيك شي يالعنود
عنود : لا يبه بسيطه
نايف : هذا التشجيع الخايس
صقر : عنود تحسين دوخه ترا الكوره قويه
عنود
بقوه : مب شغلك
ابو مازن: عنود خلصنا
مازن ضحك:لا لا مادام تهاوش طيبه
نايف ضحك وهو يلف على مصعب اللي كان اطولهم
كلهم وكان عريض : والله مب منك من ذا الطول اللي مخلي الرؤية التحتيه عدم
مصعب خبطه على ظهره بقوه : وش رايك اشيلك
فوق واخبط بك سابع ارض
نايف: لا والله مستغنين عن ذا الخدمه يالطيب
سطام : انا تعبت خلاص اجلسوا
ابو مازن: اي والله
الجد : اجل جيبوا البلوت
مازن: اووووه يا جدي وش ذا الشبابيه المهاجمه
الجد : اليوم بنستانس مابي نكد مرره مرره
ابو مازن: تعرف البلوت يا يبه
الجد: ايه كنت العبها مع سطام وساره
نايف: اووه يا سوير
ضحكت ساره ولف سند: ايييه من الفضاوه ماعندكم
لا شغله ولا مشغله
جاء مازن بالبلوت وتقابلوا وكان سطام يجلد
ولا يبالي وقدر انه يطلعهم لين وصل الدور لصقر وتقابل مع صقر وهم كل واحد نظراته اقوى
من الثاني وكلهم لعيبه وطالت اللعبه وهم كل واحد يجلد الثاني بصمت
نايف بهمس لمصعب : لو نخليهم شوي اكلوا
بعض
مصعب : خلهم خلهم دام حرتهم فالبلوت خلهم
مالنا خلق مشاكل اكثر
وقف الموقف الصعب محتدم سيارة شريفه و رموا
كل شي ووقفوا ما عدا صقر اللي اتجه لاسماء وجلسها وجلس
جوري بهمس للعنود : ياخي شوفي كيف مسيطر
عليها حتى لبسها غيره لها
العنود :بالطقاق يا شيخه
ساره قربت : نفسي اعرف صقر من وين يجيب
فلوسه
جوري : مب مضمونه صدقيني
العنود : واحد كان مدمن طبيعي بيمشي في
الحرام بالله هذا وجه انسان سوي .
ساره : انا مابي منه شي الا يحسن تعامله
مع اسماء
جوري : شكلهم عادي يعني لو فيها شي بندري
العنود: على بالك اسبوع غايب من الله
ساره : الله يستر
نزلت شريفه وعايشه وعيالها وقربوا كلهم
يسلمون عليها بحفاوه وجلسوا ووقف نايف يصب القهوه لهم وبعد السلام والسؤال عن الحال
لفت شريفه تناظر في مصعب بهدوء : وانت وش
اخبارك
سكت مصعب شوي وقال :على ما تحبين
شريفه:وينها زوجتك
مصعب : راحت بحال سبيلها
ولفت شريفه على سطام : وش فيك وجهك شاحب
سطام : ابد ولا شي
عايشه بسماجه : هههه شكله يحب
الكل ناظرها بهدوء بما فيهم سطام وسكتوا
الجد : ساره وانا ابوك قومي حضري لنا العشاء
سطام وقف ورا ساره وقال مازن:وين
سطام : بروح اشوف اذا تبي شي من برا
وبعد ما حضروا العشاء وجهز رجعوا اجتمعوا
بالدوانيه وتعدل ابو مازن وهو يقول : دامنا مجتمعين ومبسوطين والحمدلله لمازن طلب عندك
يا عمه
الكل سكتوا وهم يناظرون سند ومازن اللي
ارتبك وما توقع ابوه يتكلم قدام الكل
سند: طلب مني انا!
ابو مازن :ايه وش فيك مستغرب
سند : والله اعرفهم ما يطيقوني كيف بيطلبوني
مازن اللي تورط وحس انها بتخرب: افا يا
عمي مهما حصل انت عمي وعلى راسي وحسبت ابوي
نايف دق مازن وهو يقرب وهو سطام : وش صاير
وش تبي من ذا النفسيه
سطام: ماقلت لنا شي يا كلب
مازن: الحين بتسمعون فكوني
الجد: وش طلبك يا مازن قول نسمعك
مازن : لا والله يقول ابوي
شريفه: ان شاء الله خير
مازن: خير يا عميمه خير
ابو مازن: مازن يا سند يطلبك يد بنتك الجوري
عم الهدوء فجأه وصار الكل يناظر الجوري
اللي كانت تأكل سند ورفعت راسها بصدمه وهي تناظر ابوها والناس وفجاء فزت برعب وانسحبت
صح تدري بس ما توقعت الحين
دق سطام مازن بصدمه:ا يا النذل ولا تقول
ولا تتكلم
نايف: كنت حاس انك بتخون العشره يا رخمه
مازن: اقول تلايط وش تخون وش رخمته
الجد: ماشاء الله هذا والله الخبر اللي
يسر
شريفه : زين انك اخيراً نويت تتزوج
عايشه:هههه والله كنت حاسه اعرف اللي يحب
انا
وللمره الثانيه ناظروها الكل بمعنى(وش وضعك)
ساره بهمس للعنود : الله يا مازن ولا تكلم
العنود: انا في صدمه
هديل: ضميني لك
دانه : هاذي نتايج الهواش معقوله ! سند
بعد صمت قال : والله اني تفاجأت بس مازن ولد عمها وأولى بها من الغريب لكن قد طلبنا
منكم طلب بعد حنا
ابو مازن هز راسه ببتسامه : ان شاء الله
خير ي ابو مصعب
لف مصعب يناظر وش ردت فعل ابوه لما نادوه
بذا الاسم ولف سند وهو يقول: مصعب طلب من عمه بنته العنود بعد
لا شعوريا شهقوا البنات كلهم واولهم عنود
وسطام اللي اتسعت عيونه بصدمه وهو يراقب العنود اللي كانت عيونها عليه وقفت هي الثانيه
بسرعه وانسحبت وللامانه هنا فعلا كانت صدمه وهدوء يعني عنود ومصعب هاذي مستحيله
واول واحد اكتئب مازن اللي توقع حياته وقفت
على قرار العنود الكل صاروا يناظرون بعض بهدوء
وقالت عايشه مثل كل مره كلامها السامج:
يوه والله لو يموت ما توافق عليه عنود عنود من غير شي مغروره وتبونها توافق على مصعب
سطام بشده: عايشه اكرمينا بسكوتك والكلام
اللي مالك به خير و لك به
شريفه : عايشه خلااص
ابو مازن انحرج وقال: هو نصيب فالنهايه
وبناخذ راي البنات وان شاء الله خير
نايف همس لمصعب : صح انها خطوه قويه منك
بس ما عليك من عايشه ان شاء الله خير
ماكان مصعب زعلان ابد بالعكس يبي هالاراء
اكثر عشان يزيد الطين بله وترفض العنود
وقف الجد : اجل دامنا تعشينا كل واحد ينام
تأخر الوقت
الكل افترقوا وكل وحده من الحريم اتجهت
لبنتها وسطام اللي اتجه مع ابو مازن للعنود
ودخلوا وشافوا العنود بالغرفه ودخل سطام
قبل ابو مازن وهو يأشر لها تسكت ولا ترد وطبعا دخل ابو مازن وهو يعرف رائي العنود في
مصعب بس جلس وهو يقول : يالعنود يا حبيبتي سمعتي كلام عمك ومصعب وهم جايين يخطبونك
وشارينك ادري ان فكرتك حول مصعب سيئه بس انا اضمنه لك ومصعب صح غلط كثير بحياته بس
تعلم وهذا هو رجال عن ستين رجال وشايل نفسه حتى عن ابوه واخلاقه تعدلت كثير ولا تفكرين
في مسألة ولده الولد صغير وان شاء الله ان وافقتي بتكسبين به اجر وانتي فكري واللي
تبين تسألينه هذا سطام عندك بيقولك كل شي
وقف ابو مازن وطلع وهو يدري بالعنود ما
بتوافق وخايف يخرب زواج مازن اللي واضح عليه ارتباكه
تقدم سطام وهو يسكر الباب ويقفله وتكتف
ولف على العنود اللي ناظرته بعيون مليانه دموع وهي خايفه من رده ولكن قوى قلبه سطام
وهو عمره ما توقع بيجي يوم ويجبر عنود على شي وخصوصاً زواج قرب وهو يقول : سمعتي ابوك
وش قال وشفتي بعينك مازن وفرحته وتعرفين مصعب بعد ما رجع كيف تغير وابيك تسمعين مني
هالكلمتين زواج من مصعب بتتزوجين والا والله
لا اسامحك ولا وجهي يقابل وجهك عمرك كله ولا بنسى سواتك
طلع وسكر الباب وهو حزين بس مضطر لانه يبي
اي شي يغير فكرته عن عنود وفارس يبي يبدل اي شي بس يشيل من باله هالمسأله ويشوف عنود
بعد شايلتها .
.
عنود اللي انهارت هنا فعلا وبكت بكت لين
ما قالت امين وهي تسمع امها تنصحها ولكن عنود من زمان خسرت وصارت الحياه ما تفرق معاها
سواء تزوجت او لا مصعب او غييره انتهى امرها كلياً وطلع شورها من يدها من زماااان وقرر
سطام عنها وانتهى مسحت دموعها وهي تقول : بستخير يمه
ام مازن: ايه يمه الله يريح بالك
وقفت عنود تصلي بحزن وتبكي وتدعي ان الله
يختار لها الخير
٠
٠
وفي غرفه ثانيه كانت جوري تصلي بفرح وحب
وشكر وتدعي الله يتمم لهم ويكتب كل خير كانت
الفرحه في قلبها مو طبيعيه ولا فاتتها نظرات مازن الخفيه لها
٠
وعند البنات اللي فرشوا ألحفتهم عند دانه
وانسدحوا كلهم وهم يسمعون سوالف عايشه الغثيثه جلست عايشه وهي تقول : بنات اليوم ما
بتسهرون مع سطام
هديل: بالله عليك هذا سؤال شايفه فيه حال
يسمح
عايشه : ليه وش فيه حالكم
هيفاء : محد فاضي عنود وجوري انخطبو واختفوا
ساره جلست بهدوء وهو تحرك لحافها بتوتر:
بنات تتوقعون عنود توافق على مصعب
ناديه : بيني وبينكم انا خايفه عنود تكره
مصعب والله لو تموت ما تاخذه واذا ما تبي سطام ما بيرضى انهم يجبرونها
هيفاء : وطبعا اذا رفضت سند النذل بيرفض
مازن
دانه : واكيد بتخرب بينهم
هديل : والعنود واعرفها لو تموت ما تضحي
عشان احد
عايشه : اقولكم من الحين رافضه واخذوا بصمتي
انسدحوا البنات بقهر من عايشه وهم كل وحده
تفكر من عندها وش بيصير
٠
اما عند الشباب كانوا جالسين فالمجلس بهدوء
ومازن اللي طق من القهر ولف وهو يقول : الحين انت يا مصعبوه ما لقيت تخطب الا معي
مصعب : ياخي انا كلمت عمي من قبل ما توقعته
اليوم حتى
نايف: تستاهلون هاذي خيانه العزابيه
سطاام دخل وهو بيده مويه وفيفادل : وش فيكم
مازن : سطام محد بيحل هالازمه الا انت
سطام: ازمة وشو
مازن: يعني قولنا وش رائي البنات المبدئي
ابتسم سطام وجلس : والله شكلهم كلهم رافضين
مازن ومصعب : اماااااا
نايف : اول عيوب الزواج صرتوا خفاف اثقل
يا بزر انت وياه
ما لف على مصعب : صفقه بالله ماني فاضي
له
محمد ولد عايشه دخل وجلس وهو يفرش فراشه
: امي تقول نام عندهم
مازن صد وهو مكشر: اصلا لو ما تطلع لي امك
من كل مكان بستغرب
سطام : اقول اخمدوا بكره اكيد بتصحون بدري
مازن: بالله سطام قول الصدق
سطام : ما رحت لهم اخذت دواء ورجعت بكره
اقولكم
نايف تحلف مع سطام وهو يضمه /يا زين العزوبيه
والراحه النفسيه
وقف مصعب وهو يرفع كمومه : مازن الفزعه
وقف مازن معه وهو يسحبون نايف اللي كان
يصارخ وهو ينادي سطام يفزع له بس سطام اللي كان ميت ضحك وسلمه لهم وطبعا ما قصروا فيه
دبغوه لما عض الارض وبعدها كل واحد على فراشه بهدوء وتفكير هادي الا نايف اللي كان
يتحسب ويدعي عليهم
٠
ومن بكره صحوا على صوت عايشه اللي ما تعرف
وش هي الخصوصيه رفست بالباب المجلس ودخلت وهي تطق ولدها محمد اللي قام المسكين مفجوع
وفز سطام ومصعب على صراخها ومصعب مطير عيونه مايدري وش السالفه
سطام وقف وهو يسحب محمد منها : يا عايشه
ما بطلتي ذا العاده هبلتي ولدك حسبي الله عليك
عايشه : خله مب متربي الا كذا
سطام : اقول وخري عنه وروحي من هنا
طلعت عايشه وهي تهدد محمد المسكين اللي
كان كبير بعمره بس انه ضعيف شخصيه والسبب امه وكان ساكت سطام : ما عليه يا محمد هاذي
امك بعد وش نسوي
محمد اللي قال بلا مباله : اصلا انا متعود
طلع وترك المجلس ومصعب اللي جالس بفراشه
بصدمه : هاذي مجنونه وشو له تطقه وشوله
سطام: ياخي مجنونه هذا طبعها على بالها
رجال كذا بتصحيه
مصعب : يا شيخ وينه وين الرجوله شخصيته
صارت عدام مسكين
مازن وهو مفتح نص عينه : اذا قضيتوا من
التحليل النفسي سكروا النور والباب
مصعب غمز لسطام وهو يقول وكإنه يهمس : ياخي
ابوي رفض يزوج مازن وحلف لو يموت ما ياخذ جوري
لا شعوريا فز مازن : لييييه ؟! وش فيني
انا
كمل سطام المقلب وكانه يمثل الضيق : ياخي
مب منك العنود بعد رفضت
مازن ارتخى وجهه بضيق وكأنه متوقع هذا الشي
: طيب وانا وش دخلني انا خطبت اول والله ياخي عمي حرام عليه مب لازم عنود توافق ..
وكان مسترسل بضيق وفجاءه انتبه لسطام اللي يضحك ومصعب معه تجمدت ملامحه : تستهبلون
صح
سطام :هههههه والله ان شاء الله لتتزوج
الجوري غصب على الكل
عصب مازن وفز وهو يلحقهم بالعقال وسطام
اللي كان قريب الباب وانحاش ومسك الباب من برا وهو يضحك على صوت الضرب وصراخ مصعب وضحكه
وفجاءه فز نايف يصرخ اللي دعس عليه مصعب بدون ما ينتبه وصار يضرب هو بعد مازن ومصعب
٠
وعند البنات اللي كانوا متجمعين في المطبخ
ويحضرون الفطور والعنود اللي ماسكه راسها بصداع من عايشه وسوالفها الممله
ودخلت ناديه وهي تقول : بنات خالي يقول
اجهزوا بعد المغرب على طول بنرجع
ساره: يا ليتكم ما تروحون
دخلت جميله وهي مبتسمه : والله ياساره بس
هالايام افراحنا كثير الحمدلله
الكل لف عليها باستغراب وقالت جميله وهي
تناظر ناديه بحب : ناديه حبيبتي خوالك سألوا عن ولد جارتنا اللي خطبك ويمدحونه وانا
قلت للحرمه ان ناديه موافقه وبيكون بكره و الا بعده الشوفه ..
#يـــــتـــــــبــــــــــع...
ليست هناك تعليقات:
إرسال تعليق